काठमाडौँ । हाँस्य अभिनेता रामचन्द्र अधिकारीले सामाजिक सञ्जालमा आफूबारे गरिएको भ्रामक हल्लालाई लिएर असन्तुष्टि जनाउँदै आफू सकुशल रहेको बताएका छन् ।
केही दिनदेखि फेसबुक, टिकटक लगायतका सामाजिक सञ्जालमा मृत्युको हल्ला फैलिएपछि उनले यस्तो हल्लाको पछाडि नलाग्न आग्रह गरेका हुन् ।
टिकटक र रिलमा यो कुरा देखेपछि आफूलाई लगातार फोन आइरहेको भन्दै कसले र कसरी हल्ला फैलायो आफूले बुझ्न नसकेको बताए ।
उनी अहिले ‘मेरी बास्सै’ लगायतका सिरियलको छायांकनसहित अन्य कार्यक्रममा समेत व्यस्त छन् । ‘दुई वर्ष अगाडि बिरामी पर्दा अस्पताल भर्ना भएको फोटो राखेर मृत्युको हल्ला गरिएछ । यसले मेरो आयु बढायो,’ उनले भने ।
अधिकारी टिभी सिरियल ‘मेरी बास्सै’मा ‘काजी साप’ पात्रको रूपमा परिचित छन् ।
