काठमाडौँ । अमेरिकामा एक नेपाली युवतीको हत्या भएको छ।
गत सोमबार साँझ ५:३० बजेको आसपासमा २१ वर्षीया मुना पाण्डेको हत्या भएको न्यूयोर्कबाट प्रकाशित हुने नेपाली अखबार नेप्योर्कले जनाएको छ ।
टेक्सासस्थित होस्टन कम्युनिटी कलेजमा अध्ययनरत मुना भोजपुरकी हुन्। शनिबारदेखि सम्पर्कविहीन रहेकी उनी सोमबार आफ्नै घरमा मृत भेटिएकी थिइन्।
नेप्योर्कले काठमाडौंमा रहेकी मुनाको आमा अनिता पाण्डेसँग गरेको कुराकानिमा उनी एकजना अमेरिकी नागरिकसँग प्रेम सम्बन्धमा रहेको र सम्बन्धलाई लिएर केही तनावमा रहेको खुलेको छ ।
होस्टन प्रहरीले उनको टाउकोमा धेरैपटक गोली प्रहार भएको बताएको नेप्योर्कले लेखेको छ । होस्टन प्रहरीले घटनाको अनुसन्धान गरिरहेको छ। हत्या कसले गरेको भन्ने सन्दर्भमा अझै सुराक नभेटिएको प्रहरीले जनाएको छ ।
