काठमाडौं । प्रधानमन्त्री केपी शर्मा ओलीले हेर्ने कथामार्फत् चर्चामा आएका प्रकाश तामाङलाई तत्काल नागरिकता दिने व्यवस्था मिलाउन गृह सचिवलाई निर्देशन दिनुभएको छ ।
प्रधानमन्त्री ओलीले गएराति १० बजे गृहसचिव एकनारायण अर्याललाई बोलाएर नागरिकताको व्यवस्था गर्न निर्देशन दिनुभएको हो । त्यस क्रममा अर्यालले दुई चार दिनभित्रै नागरिकता दिलाउन सहजीकरण गर्ने बताउनुभएको छ ।
यसअघि प्रधानमन्त्री ओलीले हेर्ने कथाकी प्रस्तोला विद्या चापागाईंलाई फोन गर्नुभएको थियो । तर त्यसबेला उहाँ व्यस्त भएकाले कुरा नभएपछि पछि सचिवालयमार्फते चापागाईं र तामाङसँग सम्पर्क भएको थियो ।
प्रधानमन्त्री ओलीले आज सामाजिक सञ्जालमार्फत् प्रकाशलाई सहयोग गर्न देखाएको अग्रसरताबारे जानकारी दिनुभएको हो ।
प्रधानमन्त्री ओलीले सामाजिक सञ्जालमा लेख्नुभएको छ–
शुभ बिहानी !!
हेर्ने कथामा प्रकाश तामाङको कथा हेरेपछि मैले सचिवालयका साथी मार्फत प्रस्तोता विद्या चापागाईंलाई फोन गरेँ । उहाँ व्यस्त रहेकाले त्यसबेला कुरा हुन सकेन। पछि सचिवालयको विद्या चापागाईं र प्रकाश तामाङसँग सम्पर्क भयो। प्रकाशलाई तत्कालको आवश्यकता नागरिकता नै रहेको बुझियो । नागरिकता भए मात्र उहाँको बैंक खाता खोल्न सकिने र सहयोग गर्न चाहनेहरूले सहयोग गर्न मिल्ने हुन्छ । नागरिकता छिटो बनाउने विषयमा राति १० बजे नै गृहसचिव एकनारायण अर्याललाई बोलाएर उहाँसँग कुरा भयो । उहाँले प्रकाशलाई दुई/चार दिन भित्रैमा नागरिकता दिलाउन सहजीकरण गर्ने व्यवस्था मिलाउनु भएको छ र यो खबर प्रकाशलाई पनि पठाइसकिएको छ। नागरिकता प्राप्त गरिसकेपछि प्रकाशलाई आवश्यक सहयोग गर्ने विषयमा पनि कुरा भएको छ ।
