काठमाडौं । नेकपा एमालेबाट विभाजित भएर गठन भएको नेकपा एकीकृत समाजवादीमा नेता व्यवस्थापनमा सकस देखिएको छ । नेता धेरै तर पार्टी सानो भएपछि व्यवस्थापनमा समस्या भएको हो ।
पदाधिकारी र पोलिटब्यूरो सदस्य चयन सर्वसम्मतबाट हुन नसकेपछि निर्वाचन गराएको एकीकृत समाजवादीले पाँच जनालाई त उपाध्यक्षको हैसियतमा वरिष्ठ नेता बनाउने आश्वासन दिएको छ ।
घनेन्द्र बस्नेत, प्रमेश हमाल, बेदुराम भुसाल र पार्टीमा आएको खण्डमा वामदेव गौतम र भीम रावललाई वरिष्ठ नेता बनाइने आश्वासन अध्यक्ष माधवकुमार नेपालले दिएको बताइएको छ । गौतम र रावल नआएमा अन्य दुई जनालाई वरिष्ठ नेता बनाइने छ ।
बेदुराम र घनेन्द्र यस्ता कार्यकर्तामा प्रभाव कम भएको तर अध्यक्ष नेपालको भित्रिया हुन् । उनीहरुले आजसम्म कुनै पनि निर्वाचन फेस गरेका छैनन् । लाभको पदमा भने पटकपटक पुगिसकेका छन् ।
नेता व्यवस्थापन गर्न समस्या भएपछि पदाधिकारी र पोलिटब्यूरो चयन गर्न मतदान नै गर्नुपरेको छ ।
३४४ केन्द्रीय सदस्य रहेको नेकपा एसमा निर्वाचनमा भने ३२२ मत मात्रै खसेको छ ।
डेढ महिनाअघि अध्यक्ष, सम्मानित नेता र महासचिव सर्वसम्मत गरेको नेकपा एसले बाँकी पदाधिकारी र पोलिटब्युरो सदस्य चयन गर्न मतदान गरेको हो । अहिले मतगणना जारी छ ।
महिला उपाध्यक्ष एक पदका लागि जयन्तीदेवी राई र रामकुमारी झाँक्रीको उम्मेदवारी परेको छ । मधेशी समुदायको उपाध्यक्षमा धर्मनाथ प्रसाद शाह र रामचन्द्र झाको उम्मेदवारी परेको छ ।
खुला चार उपाध्यक्षका लागि ११ जनाको उम्मेदवारी परेको छ । चार उपमहासचिव पदमा लक्ष्मण केसीलगायत २० जनाको उम्मेदवारी परेको छ ।
नेकपा एसमा १ अध्यक्ष, १ सम्मानित नेता, वरिष्ठसहित ७ उपाध्यक्ष, १ महासचिव, ४ उपमहासचिव, ७ सचिव रहने व्यवस्था छ ।
