काठमाडौँ । आमजनता पार्टीका अध्यक्ष प्रभु साहले बर्तमान सरकार लुटेराहरुको सरकार भएको आरोप लगाउनुभएको छ ।
काठमाडौंमा मंगलवारदेखि शुरु भएको पार्टीको केन्द्रिय समितिको बैठकको उद्घाटन सत्रलाई सम्बोधन गर्दै अध्यक्ष साहले वर्तमान सरकारले जनताको लागि केही गर्न नसक्ने बताउनु भयो । प्रमुख पार्टीका शिर्ष नेताको सत्ता स्वार्थले सबैलाई लज्जित बनाएको आरोप लगाउनु भयो । अति राजनैतिक गतिविधिले प्रदेश र स्थानीय सरकार सहज रुपमा चल्न नसकेको गुनासो गर्नुभयो । राज्यको मातहत रहेका संस्थाहरुलाई दोहन गरेर डुबाउन लागिपरेको पनि आरोप लगाउनु भयो । जनतालाई करको बोझ बोकाएर सत्तामा बसेर लुट मच्चाईरहेको बताउनु भयो ।
उहाँले भन्नुभयो, ‘देश असफलताको तदारमा छ । बर्बाद हुँदैछ । जनता केही पनि होइनन् भन्ने सन्देश गएको छ । दुई दलका प्रमुख नेता, दुई नेताको सत्ता स्वार्थले मेरो विचारमा लाज पनि लजाएको छ । विश्वासमाथि पनि विश्वास छैन । जनतालाई एउटा वाचा गरेर काम अर्को गर्दा आउने पुस्ताले के सिक्ने तपाईंहरुबाट ? यसको प्रश्न सोध्दा जनतालाई अराजक देख्छ ।’
वर्तमान सरकार र दलहरुले जनतालाई सहज जीवनयापन नदिने भन्दै अध्यक्ष साहले तेस्रो जनाअन्दोलनको आवश्यकता रहेको बताउनु भयो । आम जनता पार्टीको केन्द्रिय समितिको बैठक मंगलवार र बुधवार चल्ने कार्यतालिका रहेको बताइएको छ । बैठकले सडक आन्दोलनका केही कार्यक्रम बनाउने पनि अध्यक्ष साहले बताउनु भयो ।
