युक्रेनका लागि संयुक्त राज्य अमेरिकाको २० करोड डलरको सुरक्षा सहयोग प्याकेजको पहिलो ढुवानी कीभ आइपुगेको अमेरिकी दूतावासले जनाएको छ ।
युक्रेन र यसका पश्चिमी सहयोगीहरूले युक्रेनसँगको सिमानामा जम्मा भएका दशौँ हजार रूसी सेनाको चिन्ताका बीच यस हप्ता अमेरिकी विदेशमन्त्री एन्टोनी ब्लिन्केनको कीभ भ्रमणपछि यो डेलिभरी भएको हो । रुसले नयाँ सैन्य आक्रमणको योजनालाई अस्वीकार गरेको छ।
वासिङ्टनले डिसेम्बरमा २० करोड डलरको प्याकेज स्वीकृत गरेको थियो। “संयुक्त राज्य अमेरिकाले युक्रेनको सशस्त्र सेनालाई रुसी आक्रमणविरूद्ध युक्रेनको सार्वभौमसत्ता र क्षेत्रीय अखण्डताको रक्षा गर्ने निरन्तर प्रयासमा सहयोग गर्न यस्तो सहयोग जारी राख्नेछ”, दूतावासले शनिबार फेसबुकमा भनेको छ ।
युक्रेनका रक्षामन्त्रीले सहयोगका लागि अमेरिकालाई धन्यवाद दिएका छन् ।
यसैबीच इस्टोनिया, लाटभिया र लिथुआनियाका बाल्टिक राष्ट्रहरूले युक्रेनमा अमेरिकी निर्मित एन्टिट्याङ्क र एन्टी–एयरक्राफ्ट मिसाइलहरू युक्रेनमा पठाउनेछन् जसलाई ब्लिन्केनले वासिङ्टनले पूर्णरूपमा समर्थन गरिरहेको बताए।
“मैले छिट्टै अधिकार दिएको छु र हामी नाटो सहयोगी इस्टोनिया, लाटभिया र लिथुआनियाले युक्रेनलाई रूसको अप्रत्याशित र गैरजिम्मेवार आक्रामकता विरुद्ध आफ्नो रक्षा गर्ने क्षमतालाई बलियो बनाउनका लागि प्रदान गर्दै आएको रक्षा उपकरण हस्तान्तरणको पूर्ण समर्थन गर्दछौँ”, उनले ट्विट गरे, “युक्रेनलाई उनीहरूको लामो समयदेखिको समर्थनका लागि हामी उनीहरूलाई सलाम गर्छौं।”
रुसी राष्ट्रपति भ्लादिमिर पुटिनका प्रवक्ता दिमित्री पेस्कोभले यसै हप्ताको सुरुमा युक्रेनलाई पश्चिमी हतियार आपूर्ति अत्यन्त खतरनाक भएको भन्दै उनीहरूले ‘तनाव कम गर्न केही नगर्ने’ बताए।
पश्चिमले मस्कोको मुख्य मागहरू अस्वीकार गरेको छ । युक्रेनलाई नाटोको सदस्य बनाउन नहुने, कुनै गठबन्धन हतियारहरू रूसी सीमाना नजिक तैनाथ गर्न नहुने र नाटोले मध्य र पूर्वी युरोपबाट आफ्ना सेनाहरू फिर्ता गर्नुपर्ने मस्कोको मुख्ग माग रहिआएको छ ।
ब्लिन्केन र रुसी विदेशमन्त्री सर्गेई लाभरोभबीच शुक्रबार भएको भेटवार्ता बिना सफलता टुङ्गिएको छ । एजेन्सी
