काठमाडौँ । कृषि तथा पशुपंक्षी विकासमन्त्री रामनाथ अधिकारीले कृषि औजार कारखानाको विकास र प्रवद्र्धनका लागि सरकारले आवश्यक सहयोग गर्ने प्रतिवद्धता व्यक्त गर्नुभएको छ ।
मंगलवार वीरगञ्जस्थित कृषि औजार कारखानामा राष्ट्रिय आविष्कार केन्द्रले गरेका कामहरुको अनुगमन एवं अध्ययनका लागि पुग्नुभएका उहाँले यस्तो प्रतिवद्धता जनाउनुभएको हो ।
उहाँले राष्ट्रिय आविष्कार केन्द्रका विषयमा धेरै सन्दर्भ उठेको भन्दै नयाँ के काम गरिरहेको छ भन्ने अध्ययनका लागि आफूले अवलोकन गरेको बताउनु भयो । अवलोकनका क्रममा कृषि औजार कारखानाभित्र राष्ट्रिय आविष्कार केन्द्रले उत्पादन गरेका १५/१८ वटा कृषिसँग सम्बन्धित मेसिनरी सामान बनाउन शुरु गरेको पाएको बताउनु भयो । उहाँले कृषि औजारको उत्पादन वृद्धिका लागि मन्त्रालयले छलफल गरेर आवश्यक निर्णय लिने बताउनु भयो ।
उहाँले भन्नुभयो, ‘राष्ट्रिय आविष्कार केन्द्रका विषयमा धेरै सन्दर्भहरु उठिरहेका थिए, यो आविष्कार केन्द्रले नयाँ के गरेको छ, त्यो अध्ययन गर्न आएका हौँ । हामीले कृषि औजार कारखानाभित्र राष्ट्रिय आविष्कार केन्द्रले उत्पादन गरेका १५/१८ वटा कृषिसँग सम्बन्धित मेसिनरी सामानको अवलोकन गरेका छौँ । यहाँको अवस्था अध्ययन गरेका छौँ, मन्त्रालयमा छलफल गरेर अघि बढ्छौँ । मुलुक सञ्चालन गर्ने ठाउँमा हामी छौँ । मन्त्रालयको तवरबाट गर्नुपर्ने काममा व्यापक छलफल गरेर अघि बढ्नेछौँ ।’
राष्ट्रिय आविष्कार केन्द्रका अध्यक्ष महावीर पुनले अहिले आविष्कार केन्द्रले झन्डै २० किसिमका नमूना कृषि औजारहरु बनाउन परीक्षण गरेको बताउनु भयो । उहाँले उत्पादन शुरु गर्न आफूहरु तयार रहे पनि विद्युत प्राधिकरणले ५ सय केबीको लाइनको ट्रान्सफरर्मर राख्न ढिला गर्दा उत्पादन गर्न नसकेको बताउनु भयो । उहाँले साना किसानलाई चाहिने र उपयोग हुने औजारहरु उत्पादन गर्ने पनि बताउनु भयो । उहाँले राष्ट्रिय आविष्कार केन्द्रले अहिलेसम्म २ करोड खर्च गरिसकेको र अब २० करोडको जिम्मा लिने बताउनु भयो । बाँकी सहयोगमा सरकारले गर्न आवश्यक नीति नियम बनाउन आग्रह गर्नुभयो ।
उहाँले भन्नुभयो, ‘अहिले हामीले झन्डै २० किसिमका नमूना औजारहरु बनाएका छौँ । सबै परीक्षण भएर सफल भएका छन् । अब के के औजार बनाउने भनेर धेरै वटक नमूना परीक्षण गरेर सफल गरेका छौँ । अबको ६ महिनाभित्र उत्पादन नै शुरु गर्ने तयारीमा छौँ । ट्रान्सफरर्मर राख्न विद्युत प्राधिकरणले ढिला गरेको छ । ५ सय केबीको लागि हामीले भनेका थियौँ । हामी वामे सर्दै गरेको अवस्था हो । अझै केही समय लाग्छ । साना किसानलाई चाहिने र उपयोग हुने कुरालाई लक्ष्य गरेर परीक्षण भइरहेको छ । राष्ट्रिय आविष्कार केन्द्रले अहिलेसम्म २ करोड खर्च गरिसकेको छ । अब २० करोड जति जिम्मा लिन्छौँ । सरकारको तर्फबाट कसरी थप्ने, कति ल्याउने भन्ने किसिमको नीति निर्देशन दिन सहयोग के गर्ने त्यसमा सहयोग गर्न आग्रह गर्दछु ।’
सोही अवसरमा मन्त्री अधिकारीले सुक्खा बन्दरगाह भन्सार कार्यालय वीरगञ्ज र वीरगञ्ज भन्सार कार्यालयको अवलोकन गर्नुभएको थियो ।
