एजेन्सी । इंग्लिस प्रिमियर लिग फुटबल अन्तर्गत लिभरपुलले जित निकालेको छ ।
आइतबार राति भएको खेलमा लिभरपुलले क्रिस्टल प्यालेसलाई उसकै मैदानमा ३-१ गोल अन्तरले पराजित गरेको हो ।
खेलको आठौं मिनेटमा नै भ्यान डाइकले गोल गर्दै लिभरपुललाई सुरुवाती अग्रता दिलाएका थिए ।
३२ औं मिनेटमा एलेक्स वोक्सालेड चाम्बरलीनले गोल गर्दै लिभरपुलको अग्रता दोब्बर पारे ।
५५ औं मिनेटमा ओड्सन इडुआर्डले गोल गर्दै क्रिस्टल प्यालेसलाई खेलमा फर्काए । तर, ८९ औं मिनेटमा पेनाल्टीमार्फत फाबिन्होले गोल गर्दै लिभरपुलको जित सुनिश्चित गरे ।
जितसँगै लिभरपुल २२ खेलबाट ४८ अंकसहित तालिकाको दोस्रो स्थानमा छ । यता, प्यालेस समान खेलबाट २४ अंकसहित १३ औं स्थानमा छ ।
यस्तै, आइतबार राति नै भएको अर्को खेलमा लेस्टर सिटी र ब्राइटनले बराबरी खेलेका छन् ।
लेस्टरको घरेलु मैदान किंग पावर स्टेडियममा भएको खेलमा १-१ गोलको बराबरी खेल्दै दुबै टिमले अंक बाँडे ।
खेलको ४६ औं मिनेटमा पास्टन डाकाले गोल गर्दै लेस्टरलाई सुरुवाती अग्रता दिलाएका थिए । यता ८२ औं मिनेटमा डेनी वेल्बेकले गोल गर्दै ब्राइटनलाई बराबरीमा ल्याए ।
त्यसपछि थप गोल हुन सकेन र खेल बराबरीमा सकियो । बराबरीपछि २२ खेलबाट ३० अंकसहित ब्राइटन नवौं स्थानमा छ भने २० खेलबाट २६ अकसहित लेस्टर १० औं स्थानमा छ ।
