काठमाडौं । राष्ट्रिय प्रजातन्त्र पार्टी (राप्रपा)ले हिन्दुराष्ट्र र राजसंस्थाका लागि १२ पुसमा ७७ जिल्ला सदरमुकाममा जिल्ला प्रशासन कार्यालयमार्फत नेपाल सरकारसमक्ष ज्ञापनपत्र बुझाउने भएको छ ।
‘भ्रष्टाचार, धर्मपरिवर्तन, कोरोना महामारी नियन्त्रण, बेरोजगारी समस्या समाधानलगायतका विषयमा सरकारको असफलता एवं उदासीनताको विरुद्धमा तथा सनातन हिन्दुराष्ट्र र संवैधानिक राजसंस्था पुनर्स्थापनाको निमित्त पहिलो चरणमा देशव्यापी जनप्रदर्शन र संघर्ष गर्ने निर्णय गरेको छ ।’ राप्रपा नेता मोहन श्रेष्ठले बताए ।
नेता श्रेष्ठका अनुसार राप्रपाले पुस १२ देखि २१ गतेसम्म जिल्ला सदरमुकाम र ठूला सहरहरूमा मोटरसाइकल र्याली गर्नेछ भने १५ देखि २५ पुसभित्र जिल्ला सदरमुकाममा जनप्रदर्शन गर्ने भएको छ । अध्यक्ष कमल थापाले बोलाएको पार्टी केन्द्रीय सचिवालय कार्य व्यवस्था समितिको बैठकले यो निर्णय गरेको हो ।
