तेल अभिभ । प्रायः हामीले जेलबाट तस्करी भएको सुन्ने गर्छौं जसमा अवैधरूपमा जेलभित्र र बाहिर सामान ओसारपसार गरिन्छ। यसमा प्रायः हतियार, मोबाइल, पैसा जस्ता चीजहरू तस्करी गरिन्छ। तर एक आतङ्ककारीले आफू जेलमा हुँदा वीर्य तस्करी गर्ने गरेको दाबी गरेका छन् । यसका लागि उनले चिप्सका प्याकेटहरू प्रयोग गर्थे। यति मात्र होइन आतङ्कवादीले अहिलेसम्म आफ्नो शुक्रकीटले चार सन्तान जन्माएको बताएका छन् ।
प्यालेस्टिनी आतङ्कवादीको दाबी अचम्मको छ। डेलीस्टारको रिपोर्टका अनुसार यी दावीहरू इजरायलमा १५ वर्ष जेलमा रहेका आतङ्कवादी रफत अल–कारावीले प्यालेस्टिनी प्राधिकरणको टेलिभिजनमा गरेका हुन्। शरीरबाट बाहिर निस्किएपछि शुक्रकीट लामो समयसम्म बाँच्न सक्तैनन् तर अल–कारावीले जेलबाट वीर्य डोनरको नाम लेखिएको प्याकेट पठाइएको दावी गरेका छन् । आतङ्कवादीले भने, “हामी जेलको क्यान्टिनबाट वीर्य तस्करी गर्थ्यौं।”
कैदीको वीर्यबाट १०१ बच्चाको जन्म
प्यालेस्टिनी कैदीहरूले जेल क्यान्टिनबाट आफ्नो परिवारलाई कुनै पनि पाँच वस्तु पठाउन सक्छन्। यसमार्फत शुक्रकीटले भरिएको प्याकेट बाहिर पठाइन्थ्यो । प्यालेस्टिनियन मिडिया वाचका अनुसार हालसम्म करिब १०१ बच्चाहरू यसरी जन्मिएका छन्। ती आतङ्ककारीले अल–अक्सा शहीद ब्रिगेडको सदस्य भएको दाबी गरेका छन् । उनलाई इजरायल विरुद्ध आतङ्कवादी गतिविधिमा संलग्न भएको पाइएपछि सन् २००६ मा इजरायलले पक्राउ गरेको थियो ।
कसरी हुन्थ्यो वीर्य तस्करी ?
रिपोर्टका अनुसार अल–कारावीले भने, “हामीले नमूनालाई आलु चिप्स वा कुकीजको प्याकेट भित्र राख्थ्यौँ र यसलाई व्यावसायिकरूपमा सिल गर्दथ्यौँ ताकि जेल गार्ड वा इजरायली पुलिस अधिकारीहरूलाई प्याकेट खोलिएको थाहा नहोस्।” उनले थपे,“‘क्यान्टिनबाट बाहिर निस्कँदा कैदीसँग भएको झोलालाई नमूना लिन आउने कैदीबाहेक अरु कसैले छुँदैनन् । प्याकेटमा सबैको नाम लेखिएको थियो ।” परिवारले कैदीको नमूना लिएर रजान मेडिकल सेन्टरमा बेच्ने गर्दथे ।
