काठमाडौं । नेकपा (माओवादी केन्द्र) का नेता वर्षमान पुनले पार्टीमा महासचिवको लागि आफ्नो दावेदारी रहने बताउनु भएको छ । चीनमा उपचार गरी आज साँझ काठमाडौँ ओर्लनु भएका नेता पुनले विगतमा सचिव भएर काम गरेकोले अहिले महासचिवको स्वाभाविक दाबेदार भएको बताउनुभयो । आफ्नो दाबेदारी प्रस्तुत गर्दा पार्टी भित्रको सहमतिलाई पनि स्वीकार गर्ने नेता पुनले बताउनुभयो ।
यो पनि पढ्नुहोस – चीनबाट वर्षमानको फोन, मलाई नभए शक्ति बस्नेतलाई महासचिव
नेता पुनले भन्नुभयो ‘पार्टीमा मैले महासचिवमा दाबी गरेको हुँ । विगतमा पनि सचिव भएर काम गरेको थिएँ। त्यसकारण महासचिवमा मेरो दाबेदारी स्वभाविक हो ।’ यस्तै नेता पुनले पार्टीको सबै तहमा समझदारीबाटै नेतृत्व चयन भएर आएको अवस्थाले आन्तरिक एकता र समझदारिमा पाएको जिम्मेवारी आफुले स्वीकार गर्ने पनि बताउनु भयो । नेता पुनले भन्नुभयो ‘छलफल हुँदै गर्दा कहाँनेर फिट हुने भन्ने कुरा समझदारीबाट गर्न सकिन्छ भन्ने मलाई लाग्छ ।’
झण्डै ४ महिना लामो उपचार सकेर नेता पुन आज साँझ नेपाल फर्किनुभएको हो । क्रिकलर नाजार टाइप टु सिन्ड्रोम नामक दुर्लभ बंगाणुगत जण्डिस रोगबाट ग्रसित नेता पुन उपचारको लागि गत अशोज १३ गते थाईल्याण्डको बैंकक जानुभएको थियो । बैंकक पछि थप उपचारको लागी चीनको सेन्जेनमा रहेको थर्ड पिपुल्स हस्पिटल अफ सेनजेन लागिएको थियो ।
