काठमाण्डौ । काठमाण्डौ जिल्लामा रहेका सहयोगापेक्षी सडकआश्रित मानवहरुको व्यवस्थापनका लागि काठमाण्डौ जिल्लामा निर्माण हुने शहीद धर्मभक्त माथेमा महानगर मानवसेवा आश्रमको डीपीआर तयार भएको छ । नागार्जुन नगरपालिका (६ मा बन्ने भवनको अबको निर्माण प्रक्रियालाई अगाडी बढाउन डीपीआर डिजाइन गरिरहेको काठमाण्डौ महानगरपालिका अन्तर्गतको शहरी योजना आयोगले नागार्जुन नगरपालिकालाई उक्त डीपीआर डिजाइन सहितको फाइल हस्तान्तरण गरेको हो ।
उक्त फाइल काठमाण्डौ महानगरपालिकाका नगर प्रमुख एवं शहरी योजना आयोगका अध्यक्ष विद्यासुन्दर शाक्यज्यूले नागार्जुन नगरपालिकाका नगर प्रमुख मोहन बस्नेतज्यूलाई हस्तान्तरण गर्नुभएको हो । उक्त निर्माण हुने भवनको सम्पूर्ण लगानी काठमाण्डौ महानगरपालिकाले गर्ने र त्यसको व्यवस्थापन नागार्जुन नगरपालिकाले गर्नेछ । भवन निर्माण पश्चात सडकमानवको व्यवस्थापनका लागि भवन मानवसेवा आश्रमले सदुपयोग गर्नेछ ।
भवन निर्माणका लागि अनुमानित ११ करोडको लागत रहेको छ भने १८० जना सहयोगापेक्षी व्यक्तिहरु उद्धार गरि व्यवस्थापन गर्नका लागि २५ जना सेवामा रहने टिमको आवासीय सुविधा भवनमा रहनेछ । कार्यक्रममा काठमाण्डौ महानगरपालिकाका उप प्रमुख हरिप्रभा खड्गीज्यू, नागार्जुन नगरपालिकाका योजना शाखा प्रमुख नारायण तिमिल्सिनाज्यू, मानवसेवा आश्रमका अध्यक्ष रामजी अधिकारीज्यू लगायतको उपस्थिति रहेको थियो ।
हाल मानवसेवा आश्रमले काठमाण्डौ महानगरपालिका ( २६, सामाखुसी र नागार्जुन नगरपालिका ( १, रानीबनबाट २०५ जनाको संरक्षण गरिरहेको छ भने देशका सातै प्रदेशको १७ जिल्लाका २४ स्थानहरुबाट १६०० बढीको संरक्षण गरि देश भरि नै सेवा प्रदान गरिरहेको छ ।
