क्यामरुन । अफ्रिकाको शीर्ष फुटबल प्रतियोगिताको एक खेलका क्रममा रङ्गशाला बाहिर भागदौड हुँदा कम्तिमा छ जनाको मृत्यु भएको छ । यो घटनाले उपमहाद्वीपको सबैभन्दा ठूलो खेलकुद प्रतियोगिता आयोजना गर्ने क्यामरुनको क्षमतामाथि प्रश्नचिह्न उठेको छ ।
क्यामरुनको मध्य क्षेत्रका गभर्नर नासेरी पल बियाले मृत्यु हुनेको सङ्ख्या धेरै हुनसक्ने बताएका छन्। “हामी हालसम्म मृत्युको कुल सङ्ख्या दिन सक्ने अवस्थामा छैनौँ”, उनले भने।
अफ्रिकन कप अफ नेसन्समा आयोजक क्यामरुन र कोमोरोसबीचको अन्तिम १६ को खेल हेर्न दर्शकहरू ओलोम्बे स्टेडियममा प्रवेश गर्ने प्रयास गर्दा भागदौड मच्चिएको थियो।
मासासी अस्पतालका अधिकारीहरूले कम्तिमा ४० जना घाइतेलाई अस्पतालमा ल्याइएको बताएका छन्। अस्पतालले सबैको उपचार गर्न नसकेको अधिकारीहरुले बताएका छन् । एक नर्सले भनिन्, “कतिपयको अवस्था निकै नाजुक छ । हामी तिनलाई अर्को अस्पताल पठाउनेछौँ।”
भागदौडको चपेटामा बालबालिका पनि
भागदौडपछि रङ्गशालाको प्रवेशद्वारबाहिर मानिसहरु बेहोस भएर लडिरहेका थिए । उनीहरुका जुत्ता, टोपी र रङ्गीन झण्डा छरिएका थिए ।
प्रत्यक्षदर्शीका अनुसार भागदौडमा बालबालिका समेत घाइते भएका छन् । रङ्गशालाका कर्मचारीले ढोका बन्द गरेर भित्र पस्न नदिएपछि भागदौड मच्चिएको उनीहरुको भनाइ छ ।
६० हजार दर्शक क्षमताको रङ्गशालामा कोरोना महामारीका कारण ८० प्रतिशतलाई मात्र प्रवेश गर्न दिइएको थियो । फुटबल अधिकारीका अनुसार करिब ५० हजार दर्शकले प्रवेश गर्ने प्रयास गरेका थिए ।
पहिलो पटक अफ्रिकन कप आयोजना गर्दै क्यामरुन
अफ्रिकी फुटबल महासङ्घले भनेको छ, “हामी स्थितिको अनुसन्धान गरिरहेका छौँ। विस्तृत विवरण सङ्कलनको प्रयास भइरहेको छ । हामी क्यामरुन सरकार र स्थानीय आयोजक समितिसँग सम्पर्कमा छौँ।”
क्यामरुनले ५० वर्षमा पहिलो पटक अफ्रिकन कप आयोजना गर्दैछ। उसले सन् २०१९ मा नै आयोजना गर्ने थियो तर तयारीको आशङ्काका कारण इजिप्टलाई हस्तान्तरण गरिएको थियो ।
यसअघि आइतबार याओन्डेको एक नाइटक्लबमा शृङ्खलाबद्ध विस्फोटनपछि भएको आगलागीमा परी कम्तीमा १७ जनाको मृत्यु भएको थियो ।
क्यामरुनका राष्ट्रपति पल बियाले देशले सबैभन्दा ठूलो फुटबल प्रतियोगिता आयोजना गरिरहेको भन्दै मानिसहरूलाई सतर्क रहन आग्रह गरे ।
क्यामरुनले सोमबार म्याच २–१ मा जित निकाल्दै क्वाटरफाइनलमा प्रवेश गरेको छ ।
