काठमाडौँ । युरो २०२४ फुटबल प्रतियोगिता अन्तर्गत स्पेन नकआउट चरणमा प्रवेश गरेको छ ।
गएराति भएको खेलमा इटालीलाई १–० गोलले हराउँदै स्पेन अन्तिम १६ मा प्रवेश गरेको हो । खेलको ५५ औं मिनेटमा इटालीका रिकार्डो कालाफिओरीले आत्मघाती गोल गरे । यो उपहार गोल नै स्पेनको विजयी गोल बन्यो । समूह बी मा स्पेन २ खेलबाट ६ अंकसहित शीर्षस्थानमा छ भने इटाली ३ अंकसहित दोस्रो स्थानमा छ ।
यस्तै, गएराति नै भएको अर्को खेलमा इंग्ल्यान्ड र डेनमार्कले बराबरी खेलेका छन् । खेलको १८ औं मिनेटमा ह्यारी केनले गोल गर्दै इंग्ल्यान्डलाई सुरुवाती अग्रता दिलाएका थिए ।
३४ औं मिनेटमा मोर्टेन जुल्मान्डले गोल गर्दै डेनमार्कलाई १–१ गोलको बराबरीमा ल्याए । त्यसपछि दुबै टिमबाट थप गोल हुन सकेन र दुबै टोली अंक बाँड्न बाध्य भए ।
समूह सी मा इंग्ल्यान्ड २ खेलबाट ४ अंकसहित शीर्षस्थानमा छ भने डेनमार्क २ अंकसहित दोस्रो स्थानमा छ ।
बिहीबार नै भएको अर्को खेलमा स्लोभेनिया र सर्बियाले १–१ गोलको बराबरी खेलेका छन् । खेलको ६९ औं मिनेटमा जान कर्मिचनिकले गोल गर्दै स्लोभेनियालाई सुरुवाती अग्रता दिलाएका थिए ।
तर, खेल सकिनै लाग्दा अन्तिम समयमा इन्जुरी समयमा लुका जोभिकले गोल गर्दै सर्बियाको हार टारे । समूह सीमा रहेका स्लोभेनिया २ अंकसहित तेस्रो र सर्बिया १ अंकसहित चौंथो स्थानमा छ ।
