काठमाडौं । असार महिनाका लागि वाणिज्य बैंकहरूले निक्षेपको ब्याजदर थप घटाएका छन् । बैंकहरूले अघिल्लो महिनाको तुलनामा औसतमा ०.१२ प्रतिशतले व्यक्तिगत मुद्दती निक्षेपको ब्याजदर घटाएका हुन् ।
असार महिनाका लागि २० वाणिज्य बैंकमध्ये तीन बैंकले निक्षेपको ब्याजदर बढाएको छ भने ११ ले घटाएका छन् ।
असारमा हिमालयन बैंक,नबिल बैंक र माछापुच्छ्रे बैंकले ब्याजदर बढाएको छ । हिमालयन बैंकले जेठमा ७.५ प्रतिशत ब्याजदर तोकेकोमा असारमा बढाएर ८.२५ प्रतिशत पुर्याएको छ ।
यस्तै, नबिल बैंकले ६.७५ प्रतिशतबाट ७ प्रतिशत पुर्याएको छ । माछापुच्छ्रे बैंकले ५.२६ प्रतिशत दिँदै गरेकोमा असारको लागि ७.५ प्रतिशत बनाएको छ ।
असारमा कृषि विकास, नेपाल बैंक, नेपाल इन्भेस्टमेन्ट मेगा, सिद्धार्थ, स्ट्यान्डर्ड चार्टड र प्रभु बैंकले व्यक्तिगत मुद्दती निक्षेपको माथिल्लो सीमा जेठकै ब्याजदरलाई निरन्तरता दिएका छन् । सबैभन्दा न्यून ब्याजदर कृषि विकास बैंकको ५.६६ प्रतिशत र एभरेस्ट बैंकको ५.७५ प्रतिशत छ ।
राष्ट्रिय वाणिज्य बैंक, नेपाल एसबीआई, लक्ष्मी सनराइज, ग्लोबल आईएमई, कुमारी, प्राइम, सानिमा, सिटिजन्स, एनएमबी र एनआईसी एसिया बैंकले भने ब्याजदर घटाएका छन् ।
