एजेन्सी । टी–२० विश्वकप २०२४ मा लगातार तीन जित दर्ता गर्दै भारत सुपर–८ मा छनोट भएको छ । तेस्रो खेलमा अमेरिकालाई ७ विकेटले हराएपछि रोहित शर्माले टोलीको प्रदर्शनको तारिफ गरेका छन् ।
यसबाहेक न्युयोर्कको पिचबारे उनले यहाँ क्रिकेट खेल्न सजिलो नभएको बताए । उनले अर्शदीप सिंह, सूर्यकुमार यादव र शिवम दुबेको पनि प्रशंसा गरे ।
खेलपछि रोहित शर्माले भने, ‘हामीले अमेरिकाका केही खेलाडीसँग खेलेका छौं । यी खेलाडीले एमएलसीमा पनि खेलिसकेका छन् । उनीहरुले आफ्नो छाप छोडिरहेका छन् र उनीहरुको यस्तो प्रदर्शन देखेर म खुसी छु । हाम्रा सूर्य जस्ता अनुभवी खेलाडीले आवश्यकता अनुसार ब्याटिङ गर्ने अपेक्षा गरेका छौँ र आज दुबेसँगको उनको साझेदारी हाम्रो लागि निकै महत्त्वपूर्ण थियो ।’
रोहितले सुपर ८ मा पुग्नु ठूलो राहत भएको बताउँदै भने – यहाँ क्रिकेट खेल्न सजिलो छैन । हामीले तीनवटै खेलमा अन्तिमसम्म टिक्न बाध्य थियौं । यी जितहरूले हामीलाई धेरै आत्मविश्वास दिनेछन् । हाम्रा बलरहरूले राम्रो बलिङ गरे, विशेष गरी अर्शदीप सिंहले इकोनमिक रूपमा बलिङ गरे । शिवम दुबेले परिस्थितिसँग खेले । तपाईलाई विकल्पहरू चाहिन्छ र हामीले सकेसम्म तिनीहरूलाई प्रयोग गर्न सक्षम हुन आवश्यक छ । आज पिच फास्ट बलरका लागि अनुकूल थियो, त्यसैले प्रयोग गर्न चाहन्थेँ ।’
पहिले ब्याटिङ गरेको अमेरिकाले २० ओभरमा ८ विकेट गुमाएर ११० रन बनाएको थियो । अर्शदीप सिंहले चार ओभरमा ९ रन दिएर चार विकेट लिए । जवाफमा भारतले तीन विकेट गुमाएर लक्ष्य पुरा गर्यो । सूर्यकुमार यादवले अविजित ५० र शिवम दुबेले अविजित ३१ रनको योगदान दिए ।
