काठमाडौँ । आयोजक वेस्ट इन्डिज टी–२० विश्वकपको सुपर ८ मा प्रवेश गरेको छ । भर्खरै सम्पन्न खेलमा न्युजिल्यान्डलाई १३ रनले हराउँदै वेस्ट इन्डिज सुपर ८ मा प्रवेश गरेको हो । यता, न्युजिल्यान्डको भने यो लगातार दोस्रो हार हो । हारसँगै टोलीको सुपर ८ यात्रा कठिन बनेको छ ।
वेस्ट इन्डिजले दिएको १५० रनको लक्ष्य पछ्याएको न्युजिल्यान्डले २० ओभरमा ९ विकेट गुमाएर १३६ रन जोड्यो । उसका लागि ग्लेन फिलिप्सले ४०, फिन एलेनले २६, मिचेल सान्टनरले अविजित २१, डेरी मिचेलले १२, रचिन रविन्द्र र जेम्स निसमले १०–१० रन जोडे ।
बलिङतर्फ वेस्ट इन्डिजका अल्जारी जोसेफले ४, गुदाकेश मोतीले ३ तथा अकिल हुसेन र आन्द्रे रसेलले १–१ विकेट लिए ।
त्यसअघि ट्रिनिडाड एण्ड टोबागोस्थित ब्रायन लारा क्रिकेट एकेडेमीमा टस हारेर पहिले ब्याटिङ थालेको वेस्ट इन्डिजले २० ओभरमा ९ विकेट गुमाएर १४९ रन जोड्यो । वेस्ट इन्डिजले अन्तिम २ ओभरमा ३७ रन जोडेको थियो ।
उसका लागि शेर्फेन रदरफोर्डले विष्फोटक ब्याटिङ गरे । उनले ३९ बलमा ६८ रन जोडे । उनको ब्याटबाट ६ छक्का र २ चौका निस्कियो । यस्तै, निकोलस पुरनले १७, अकिल हुसेनले १५, आन्द्रे रसेलले १४ तथा रोमारियो शेफर्डले १३ रन जोडे ।
बलिङतर्फ न्युजिल्यान्डका ट्रेन्ट बोल्टले ३, टिम साउथी र लोकी फर्ग्युसनले २–२ तथा जेम्स निसम र मिचेल सान्टनरले १–१ विकेट लिए ।
