एजेन्सी । टी–२० विश्वकप २०२४ को महाभिडन्त आज भारत र पाकिस्तानबीच हुँदैछ । न्यूयोर्कमा हुने यो खेलअघि भारतीय टोलीका स्टार विकेटकिपर ब्याट्सम्यान ऋषभ पन्तले विपक्षी टोलीका कप्तान बाबर आजमबारे टिप्पणी गरेका छन् ।
एक टिभी कार्यक्रममा दिएको अन्तर्वार्ताका क्रममा उनले फ्यानले चलाएको किस्सालाई उल्लेख गर्दै ब्याट्सम्यानबारे व्यंग्य गरेका हुन् ।
ऋषभ पन्त नासाउ काउन्टी इन्टरनेशनल क्रिकेट स्टेडियममा खेलिने खेलअघि टिभी कार्यक्रममा पुगेका थिए । यहाँ उनले भारत–पाकिस्तान खेललाई लिएर फ्यानहरुको उखानको चर्चा गरेका छन् । उद्घोषकले सोधे, ‘भारत र पाकिस्तानबीचको खेलमा ‘तेल लगाओ डाबर का, विकेट गिराओ बाबर का’ जस्ता नारा धेरै लगाइन्छ । त्यसमा पन्त मुस्कुराउदै भने, ‘म भन्न चाहन्छु कि खेलाडीको रुपमा हेर्दा उनीहरु पनि आफ्नो देशका लागि धेरै मेहनत गर्छन् । यो होइन कि त्यहाँ ठट्टा छ, तर एउटा चाखलाग्दो कुरा यो छ कि भावनाहरू एकसाथ आउँछन्, भारत एक देशको रूपमा, पाकिस्तान एक देशको रूपमा । फ्यानहरू पनि नयाँ–नयाँ उखानहरु सुरु गर्छन् । तपाईले भनेजस्तै… ‘तेल लगाउ डाबरको, विकेट गिराउ बाबरको’ । सर, यी सबै कुराले थप रोचक बनाउँछ ।
टी–२० विश्वकपमा पाकिस्तानविरुद्ध भारतको कीर्तिमान उत्कृष्ट रहेको छ । सन् २००७ यता दुवै टोली यस प्रतियोगितामा सात पटक आमनेसामने भएका छन् । जसमध्ये भारतले ६ पटक र पाकिस्तानले एक पटक जितेको छ । योसँगै दुई टोलीबीच समग्र टी–२० मा १२ खेल भएका छन् । भारतले आठ पटक र पाकिस्तानले तीन पटक जितेको छ ।
२००७ मा एक खेल टाई भएको थियो, जुन भारतले ‘बाउल आउट’मा जित्यो । अर्थात् टिम इन्डियाले १२ मध्ये ९ वटा जितेको छ । पछिल्लो पटक सन् २०२२ मा भएको विश्वकपमा भारत र पाकिस्तानको टोली आमनेसामने भएका थिए र त्यसपछि मेलबर्नमा भएको खेलमा भारतले पाकिस्तानलाई चार विकेटले पराजित गरेको थियो ।
२०२४ को टी–२० विश्वकपमा कुल २० टोलीले खेलिरहेका छन्, जसलाई चार समूहमा विभाजन गरिएको छ । समूह ए मा भारत र पाकिस्तान रहेका छन् । आयोजक अमेरिका बाहेक यसमा क्यानडा र आयरल्याण्ड पनि परेका छन् । आफ्नो पहिलो खेलमा जित हात पार्दै भातर अंक तालिकाको दोस्रो स्थानमा रहेको छ भने पहिलो खेलमा पाकिस्तानले हार बेहोरेको थियो । आज दुवै टोलीले आफ्नो दोस्रो खेल खेल्नेछन् ।
