• ७ असार २०८१, शुक्रबार
  •      Fri Jun 21 2024
  •   Unicode
Logo
Latest
★   रास्वपाको चियापान कार्यक्रममा शीर्ष नेताहरु– तस्बिरहरु ★   कर्नाटक प्रहरीको खुलासाः प्रमाण नष्ट गर्नका लागि दर्शनले साथीसँग ४० लाख रुपैयाँ लिए ★   ग्लोबल आइएमई बैंकका ग्राहकलाई आरुष लाइफस्टाइल हस्पिटलमा ३० प्रतिशतसम्म छुट ★   वातावरण व्यवस्थापनमा तीन प्रतिशत बजेट विनियोजन गर्दै चन्द्रागिरि नगरपालिका ★   पृथ्वीराजमार्गको थर्पु–खैरेनीटार खण्ड एकतर्फी सञ्चालनमा ★   योगलाई धर्म र जातमा सिमित गर्नु हुँदैनः अध्यक्ष ओली ★   जब पृथ्वीमा १०–२० लाख वर्षसम्म लगातार पानी परिरहन्थ्यो ★   ९० दशककी ‘सोनपरी’ आजभोलि के गर्दैछिन् ? ★   डेल्टा कम्प्लेक्समा भएको आगलागीबाट ५० करोड क्षतिको अनुमान ★   शासकीय सुधारका लागि संविधान संशोधनमा जानुपर्छ: पूर्वप्रधानमन्त्री डा भट्टराई (अन्तरवार्ता)

टी–२० विश्वकपः पाकिस्तान पहिलो पटक आईसीसीको पूर्ण सदस्य नभएको टोलीसँग पराजित



काठमाडौँ । अमेरिकाले टी–२० विश्वकप २०२४ को पहिलो ठूलो उथलपुथल निम्त्याएको छ । उसले समूह ए को खेलमा २००९ को च्याम्पियन पाकिस्तानलाई सुपर ओभरमा पराजित गरेको हो । यो खेल टेक्सासको डलासस्थित ग्रान्ड प्राइरी स्टेडियममा भएको थियो ।

टस हारेर पहिले ब्याटिङ गरेको पाकिस्तानले २० ओभरमा सात विकेट गुमाएर १५९ रन बनाएको थियो । कप्तान बाबर आजमले सर्वाधिक ४४ रन बनाएका थिए । जवाफमा अमेरिकाको टोलीले पनि २० ओभरमा तीन विकेट गुमाएर १५९ रन बनाउन सक्यो । कप्तान मोनांक पटेलले सर्वाधिक ५० रन बनाए । यसपछि खेल सुपर ओभरमा पुगेको थियो ।

सुपर ओभरमा पहिले ब्याटिङ गरेको अमेरिकाले १८ रन बनाएको थियो । जवाफमा पाकिस्तानले ६ बलमा १३ रन मात्र बनाउन सक्यो । मोनाङ्क खेलको प्लेयर अफ दि म्याच घोषित भए । २०२४ को टी–२० विश्वकपमा पाकिस्तानको यो पहिलो खेल थियो र त्यसैमा उसले आफूभन्दा निकै कमजोर रहेको अमेरिकासँग हार बेहोरेको छ ।

यो जितसँगै अमेरिकी टोली दुई जित र चार अंकसहित समूह ए को शीर्ष स्थानमा पुगेको छ । योसँगै भारत एक खेलपछि दुई अंक जोडेर दोस्रो स्थानमा छ ।

पाकिस्तानको अर्को खेल जुन ९ मा भारतसँग हुनेछ । यस्तै, अमेरिकाको टोलीले अब जुन १२ मा भारतको सामना गर्नेछ ।

टी–२० विश्वकपमा अहिलेसम्म पाँच खेल बराबरीमा सकिएको छ । जसमध्ये पाकिस्तानी टोलीका दुई खेल बराबरीमा परेका छन् । अमेरिकाअघि सन् २००७ को टी–२० विश्वकपमा भारतसँग पाकिस्तानको खेल टाई भएको थियो । तर, त्यसबेला सुपर ओभरको सट्टा बल आउट भएको थियो ।

बलिङ गर्दा धेरै पटक विकेट प्रहार गर्ने टोली विजयी भयो । जसमा भारतले पाकिस्तानलाई बलआउटमा पराजित गरेको थियो । अब पाकिस्तान सुपर ओभरमा पनि अमेरिकासँग पराजित भएको छ ।

यी दुई खेलबाहेक, २०१२ को टी –२० विश्वकपको खेल श्रीलंका(न्यूजिल्याण्ड (पल्लेकल) बिचको, २०१२ को टी–२० विश्वकपको खेल न्यूजिल्याण्ड–वेस्ट इन्डिज (पल्लेकल) र २०२४ को टी–२० विश्वकपको खेल नामिबिया–ओमान (ब्रिजटाउन) बीचको खेल टाई भएको थियो ।। सन् २०१२ पछिको यो पहिलो संस्करण हो जसमा दुई खेल बराबरीमा परेका छन् ।

सन् २०१२ मा श्रीलंका र न्युजिल्यान्डबीच भएको सुपरओभरमा श्रीलंकाको टोली विजयी भएको थियो । यससँगै सन् २०१२ मा न्युजिल्यान्ड र वेस्ट इन्डिजबीच खेलेको सुपरओभरमा न्युजिल्यान्ड टोलीले जित हासिल गरेको थियो । यस विश्वकपमा नामिबिया र ओमानबीचको सुपर ओभरमा नामिबियाको टोलीले जित हासिल गरेको थियो ।

पाकिस्तानले टी–२० मा हालसम्म चार खेल टाई खेलेको छ । जसमध्ये उसले तीन पटक हार बेहोरेको छ । पाकिस्तानी टोली दुई पटक सुपर ओभर र एक पटक बल आउटमा पराजित भएको छ । योसँगै अमेरिकी टोलीले टि–२० मा अहिलेसम्म दुई सुपर ओभर खेलेको छ र दुवै पटक जितेको छ ।

टी–२० अन्तर्राष्ट्रियमा अमेरिकासँग पराजित हुने बंगलादेशपछि पाकिस्तान दोस्रो आईसीसी पूर्ण सदस्य टोली हो । यससँगै पाकिस्तानी टोली टी–२० अन्तर्राष्ट्रियमा पहिलो पटक गैर–पूर्ण सदस्य टोलीसँग पराजित भएको छ । अमेरिकी टोलीको यो जितले आफ्नो देशको क्रिकेटलाई नयाँ उचाइमा पुर्याएको छ । यसले टोलीलाई धेरै आत्मविश्वास दिएको छ । मोनाङ्क पटेलको नेतृत्वमा रहेको अमेरिकी टोलीले बाबर आजमको कप्तानीमा रहेको पाकिस्तानी टोलीलाई हराउँदै टी–२० विश्वकपमा अहिलेसम्मकै ठूलो उथलपुथल बनाएको छ ।