एजेन्सी । अस्ट्रेलियाका क्रिकेटर स्टिभ स्मिथले टी–२० विश्वकपलाई लिएर महत्वपूर्ण भविष्यवाणी गरेका छन् । स्मिथले यसपटक टी–२० विश्वकपमा विराट कोहलीले सबैभन्दा बढी रन बनाउने बताएका छन् ।
कोहली फर्ममा छन् । हालै उनले आईपीएल २०२४ मा पनि बलियो प्रदर्शन गरेका थिए । कोहलीले ओरेन्ज क्याप जितेका थिए ।
कोहलीलाई लिएर स्मिथले यस्तो प्रतिक्रिया दिएका छन् । इन्डिया टुडेको समाचार अनुसार स्मिथले भने, ‘मेरो अनुसार विराट कोहलीले यस पटक प्रतियोगितामा सबैभन्दा बढी रन बनाउनेछन् । उनले आईपीएलमा धमाकेदार प्रदर्शन गरेका थिए । उनी फर्ममा पनि छन् । मलाई लाग्छ उनले टीम इन्डियाका लागि चमत्कार गर्नेछन् ।’
कोहलीले आईपीएल २०२४ को १५ खेलमा ७४१ रन बनाएका थिए । यस अवधिमा उनले १ शतक र ५ अर्धशतक बनाएका थिए ।
टी–२० विश्वकपमा कोहलीको प्रदर्शनलाई हेर्दा उनी बलियो छन् । कोहलीको समग्र औसत ८१.५० रहेको छ । जबकि नकआउट खेलमा औसत १४४ रहेको छ । टी–२० विश्वकपमा सबैभन्दा धेरै रन बनाउने खेलाडीको सूची हेर्दा विराट कोहली शीर्ष स्थानमा छन् ।
कोहलीले २७ खेलमा ११४१ रन बनाएका छन् । यस अवधिमा उनले १४ अर्धशतक बनाएका छन् । कोहलीको उत्कृष्ट स्कोर ८९ रन रहेको छ । यस सूचीमा वर्तमान खेलाडीलाई हेर्दा रोहित शर्मा दोस्रो स्थानमा छन् । रोहितले ३९ खेलमा ९६३ रन बनाएका छन् ।
