एजेन्सी । टी–२० विश्वकप २०२४ आजबाट सुरु भएको छ । उद्घाटन खेलमा अमेरिकाले क्यानडालाई ७ विकेटले पराजित गरेको थियो । पहिले ब्याटिङ गरेको क्यानडाले १९४ रन बनाएको थियो । यो कठिन लक्ष्य आयोजकले ३ विकेट गुमाएर पुरा गर्यो ।
अमेरिकाका लागि आरोन जोन्स र एन्ड्रियास गोउसले बलियो पारी खेले । योसँगै क्यानडाका फास्ट बलरको नाममा लज्जास्पद कीर्तिमान दर्ता भएको छ ।
लक्ष्य पछ्याउँदा अमेरिकाले सुस्त सुरुवात गर्यो । पहिलो पावरप्लेमा अमेरिकाले १ विकेटमा ४१ रन मात्र जोडेको थियो । टोलीलाई सातौं ओभरमा दोस्रो झट्का लागेको थियो तर गोउस र जोन्सले मिलेर तेस्रो विकेटका लागि कीर्तिमानी शतकीय साझेदारी गरे ।
उनीहरुले ५८ बलमा १३१ रन जोडे । इनिङ्समा दुवैले मिलेर १४ औं ओभरमा कुल ३३ रन लिएका थिए । यो टी–२० विश्वकपको दोस्रो महँगो ओभर हो ।
क्यानडाका फास्ट बलर जेरेमी गोर्डनले वाइड ओभरको सुरुवात गरेका थिए । त्यसपछि जोन्सले छक्का र चौका प्रहार गरे । चौथो बल फेरि वाइड थियो र त्यसपछिको बल नो–बल थियो । फ्री हिट बल पनि नो–बल थियो । यसमा आरोन जोन्सले छक्का प्रहार गरे । त्यसपछि गोर्डनले फेरि वाइड बल फ्याँके जोन्सले एक रन लिए । त्यसपछिका दुई बलमा गोउसले एक छक्का र एक चौका प्रहार गरे । यो ओभरमा कुल ११ बल बलिङ गरिएको थियो ।
२००७ टी–२० विश्वकपको उद्घाटन संस्करणमा इंग्ल्याण्डका फास्ट बलर स्टुअर्ट ब्रोडले एक ओभरमा ३६ रन दिएका थिए । भारतका पूर्व अलराउन्डर युवराज सिंहले एकै ओभरमा ६ छक्का प्रहार गरेका थिए । १७ वर्षपछि क्यानडाका बलरले टी–२० विश्वकपमा एक ओभरमा ३० भन्दा बढी रन (३३) दिएका छन् । गोर्डनले तीन ओभरमा ४४ रन खर्चे ।
