काठमाडौँ । च्याम्पियन्स लिग फुटबलको उपाधि स्पेनिस क्लब रियल मड्रिडले जितेको छ ।
भर्खरै सम्पन्न खेलमा जर्मन क्लब बोरुसिया डर्टमण्डलाई २–० गोलले हराउँदै रियल च्याम्पियन बनेको हो । समग्रमा रियलको १५ औं च्याम्पियन्स लिग उपाधि हो ।
लण्डनको वेम्बली स्टेडियममा भएको फाइनलमा रियललाई उपाधि दिलाउन खेलको ७४ औं मिनेटमा डानी कार्भाहालले र ८३ औं मिनेटमा भिनिसियस जुनियरले गोल गरे ।
पहिलो हाफमा डर्टमण्डले दबाब बनाएपनि दोस्रो हाफमा रियल खेलमा फर्कियो ।
कार्भाहालले कर्नरबाट उपलब्ध भएको पासलाई हेडरमार्फत गोल गरेका हुन् । यस्तै, जुड बेलिङहमको पासमा भिनिसियले गोल गर्दै रियलको जित पक्का गरे ।
यसअघि रियलले २०२१–२२ मा लिभरपुललाई हराउँदै उपाधि जितेको थियो । यता, डर्टमण्ड भने पहिलो उपाधि जित्न चुकेको छ । २०१२–१३ मा फाइनल खेलेको डर्टमण्ड यो पटक पनि उपविजेतामा चित्त बुझाउन बाध्य भयो ।
