काठमाडौँ । इन्डियन प्रिमियर लिगको १७ औं सिजनको उपाधि कोलकाता नाइट राइडर्सले जितेको छ । केकेआरले फाइनलमा सनराइजर्स हैदरावादलाई ८ विकेटले पराजित गर्दै च्याम्पियन बनेको हो ।
यो सिजनमा धेरै नयाँ र उदीयमान खेलाडीहरु देखा परेका छन्, कोही युवाले रन र कोहीले धेरै विकेट लिएर क्रिकेट जगतमा फरक पहिचान बनाएका छन् । विराट कोहली, हर्षल पटेल र सुनिल नारायण लगायत धेरै खेलाडीले सिजनमा अवार्ड जितेका छन् ।
विजेता टोलीले २० करोड रुपैयाँ पायोः कोलकाता नाइट राइडर्सले आईपीएल २०२४ को फाइनलमा सनराइजर्स हैदरावादलाई ८ विकेटले हराएर ट्रफी जित्यो । च्याम्पियन बनेको केकेआरले २० करोड रुपैयाँ पुरस्कार पाएको छ ।
उपविजेता टोलीले कति पैसा पायो ? सनराइजर्स हैदरावाद आईपीएल २०२४ को उपविजेता टोली बन्यो, जसले लिग चरणमा धेरै ठूला कीर्तिमान आफ्नो नाममा बनाएको थियो । प्याट कमिन्सको कप्तानीमा रहेको एसआरएचलाई उपविजेताका लागि १२.५ करोड रुपैयाँ दिइएको छ ।
इमर्जिङ प्लेयर अफ द सिजनः सनराइजर्स हैदरावादका २१ वर्षीय अलराउन्डर नितिश रेड्डीले आईपीएल २०२४ को इमर्जिङ प्लेयर अफ द सिजन अवार्ड पाएका छन् । रेड्डीले यो सिजन १३ खेलमा ३३.६७ को औसतमा ३०३ रन बनाएका छन् भने बलिङमा पनि ३ विकेट लिएका छन् । नितिशले आफ्नो पहिलो सिजनमै धेरै उत्कृष्ट उपलब्धिहरू गरेका छन् । यसका लागि उनले १० लाख रुपैयाँ पाएका छन् ।
स्ट्राइकर अफ द सिजनः स्ट्राइकर अफ द सिजनको अवार्ड २२ वर्षीय दिल्ली क्यापिटल्सका तुफानी ब्याट्सम्यान जेक फ्रेजर म्याकगर्कलाई दिइयो । म्याकगर्कले आईपीएल २०२४ मा ९ खेलमा ३३० रन बनाएका थिए । २३४ को स्ट्राइक रेटका लागि उनलाई स्ट्राइकर अफ द सिजन अवार्ड दिइएको छ । यसका लागि उनले १० लाख रुपैयाँ प्राप्त गरेका छन् ।
फेन्टासी प्लेयर अफ द सिजनः फेन्टासी प्लेयर अफ द सिजन सुनिल नारायणलाई दिइएको छ, जसको लागि उनले १० लाख रुपैयाँ प्राप्त गरेका छन् । फेन्टासी क्रिकेट खेलहरूमा भाग लिने प्रयोगकर्ताहरूका लागि सुनिल नारायण सबैभन्दा महत्त्वपूर्ण खेलाडी साबित भए । बलका अलावा नारायणले यो सिजन ब्याटिङमा पनि उत्कृष्ट प्रदर्शन गरेका छन् ।
सुपर सिक्स अफ द सिजनः सनराइजर्स हैदरावादका ओपनर अभिषेक शर्माले आईपीएल २०२४ मा सबैभन्दा धेरै छक्का प्रहार गरेका छन् । अभिषेकले यस सिजनमा ४२ छक्का प्रहार गरेका थिए जसका लागि उनलाई फ्यान्टेसी सुपर सिक्स अफ द सिजन अवार्डबाट सम्मानित गरिएको थियो । त्यसैले उनले १० लाख रुपैयाँ पाए ।
अन द गो, फोर्स अफ द सिजनः सनराइजर्स हैदरावादका ट्राभिस हेडलाई सिजनमा सबैभन्दा बढी चौका प्रहार गरेकोमा अन द गो फोर्स अफ द सिजन अवार्ड दिइयो । हेडले सिजनमा कुल ६४ चौका प्रहार गरे जसका लागि उनले १० लाख रुपैयाँ प्राप्त गरे ।
क्याच अफ द सिजनः क्याच अफ द सिजन अवार्ड केकेआरका रमनदीप सिंहले पाए । लखनऊ सुपर जाइन्ट्स विरुद्धको खेलमा रमनदीपले अर्निश कुलकर्णीको यस्तो क्याच लिए, जुन उनले आफ्नो पहुँचभन्दा बाहिर भए पनि समातेका थिए । उनले १० लाख रुपैयाँ हात पारे ।
मोस्ट भ्यालुएबल प्लेयरः सुनिल नारायण आईपीएल २०२४ मा सबैभन्दा मूल्यवान खेलाडी बनेका छन् । नारायण सिजनको सुरुदेखि नै कोलकाता नाइट राइडर्सका लागि सबैभन्दा महत्त्वपूर्ण खेलाडी हुन् । उनले ब्याटिङमा ४८८ रन बनाए भने बलिङमा १७ विकेट लिए । यो प्रदर्शनले नारायणलाई सिजनको सबैभन्दा मूल्यवान खेलाडी बनायो । यसका लागि उनले १० लाख रुपैयाँ र ट्रफी पनि प्राप्त गरे ।
ओरेन्ज क्यापः विराट कोहलीले ओरेन्ज क्याप जितेका छन्, जसको लागि उनले ओरेन्ज क्याप र १० लाख रुपैयाँ प्राप्त गरेका छन् । कोहलीले आईपीएल २०२४ मा १५ खेलमा ६१.७५ को औसतमा ७४१ रन बनाएका थिए ।
पर्पल क्यापः हर्षल पटेलले सिजनमा सबैभन्दा बढी विकेट लिएकोमा पर्पल क्याप र १० लाख रुपैयाँ प्राप्त गरे । पञ्जाब किंग्सबाट खेलेका उनले १४ खेलमा २४ विकेट लिएका थिए ।
