एजेन्सी । इन्डियन प्रिमियर लिगको १७ औं सिजन अन्तिम चरणमा प्रवेश गरेको छ । कोलकाता नाइट राइडर्स (केकेआर) यसअघि नै फाइनलमा पुगेको छ । आज हुने राजस्थान रोयल्स र सनराइजर्स हैदरावाद बीचको दोस्रो क्वालिफायर खेल जित्नेले मे २६ मा कोलकातासँग फाइनल खेल्नेछ ।
इंग्ल्याण्डका दिग्गज खेलाडी ग्रिम स्वानले आईपीएल २०२४ को फाइनललाई लिएर भविष्यवाणी गरेका छन् । फाइनल खेल चेन्नईको चेपौक स्टेडियममा हुने भएको छ ।
ग्रीम स्वानले एक मिडिया अन्तर्वार्तामा कोलकाता नाइट राइडर्सले ट्रफी उचाल्ने बताएका छन् । उनले भने, कोलकाता नाइट राइडर्सले यस पटक ट्रफी उचाल्ने छ। ब्याटिङ होस्, बलिङ होस् वा फिल्डिङ होस्, केकेआर यी सबै क्षेत्रमा समृद्ध टोलीको रूपमा देखिन्छ। गौतम गम्भीर प्रशिक्षकका रूपमा फर्किएपछि कोलकाताले यो सिजन आफ्नो दबदबा कायम राखेको छ र अहिलेको उत्कृष्ट टोली हो।
केकेआरले फाइनलमा को सँग भिड्ने ?
क्वालिफायर १ मा कोलकाता नाइट राइडर्सले सनराइजर्स हैदरावादलाई ८ विकेटले पराजित गर्दै सिधै फाइनलमा प्रवेश गरेको थियो। अब आज फाइनल पुग्ने दोस्रो टोली बन्न हैदरावाद र राजस्थान रोयल्स प्रतिस्पर्धा गर्दैछन् । इंग्ल्याण्डका लिजेण्ड ग्रिम स्वानले केकेआरविरुद्धको खेलमा प्याट कमिन्सले पहिले बलिङ गर्ने निर्णय गलत भएको बताएका छन् । फिल्डको अवस्थालाई ध्यानमा राख्दै, हैदराबादले पछ्याउनुपर्ने उनले बताए ।
स्वानका अनुसार हैदरावादका खेलाडीले क्वालिफायर २ खेलमा आक्रामक क्रिकेट खेल्न सक्ने बताएका छन् । तर राजस्थान रोयल्स राम्रो टिम साबित हुने उनले बताए । उनले फाइनलमा केकेआर र आरआर बिच भिडन्तहुनसक्ने बताए ।
आईपीएलमा कोलकाता, हैदराबाद र राजस्थान तीनै टोलिले ट्रफी उचालिसकेका छन्। कोलकाता नाइट राइडर्सले सन् २०१२ र २०१४ मा गौतम गम्भीरको कप्तानीमा दुई पटक च्याम्पियन बन्ने गौरव हासिल गरेको थियो। जहाँ सन् २०१६ मा सनराइजर्स हैदरावादले उपाधि उचालेको थियो । आरआर आईपीएल इतिहासमा पहिलो च्याम्पियन बनेको थियो ।
