काठमाडौँ । आईपीएल २०२४ अन्तर्गत आज दोस्रो क्वालिफायर खेल राजस्थान रोयल्स र सनराइजर्स हैदरावादबीच हुनेछ । खेल बेलुका ७ः४५ बजेदेखि चेन्नईको एमए चिदम्बरम स्टेडियम (चेपौक)मा हुनेछ ।
यो खेल जित्ने टोली फाइनलमा पुग्ने छ जहाँ उसले कोलकाता नाइट राइडर्ससँग उपाधिका लागि खेल्नेछ । हार्ने टोलीको यात्रा यहीँ समाप्त हुनेछ ।
हैदरावादले ३ पटक क्वालिफायर २ खेलेको छ
२०१६ को च्याम्पियन सनराइजर्स हैदरावाद ७ औं पटक आईपीएलको प्लेअफमा पुगेको छ । टोली पहिलो पटक २०१३ मा प्लेअफमा पुग्यो, जुन उनीहरूको डेब्यु सिजन थियो । एसआरएच अब २०२० पछि प्लेअफमा पुगेको छ । अहिलेसम्म ६ प्लेअफमा एसआरएच २ पटक फाइनलमा पुगेको छ । उसले २०१६ मा उपाधि जित्यो भने २०१८ मा उपविजेता बन्यो । हैदरावादले क्वालिफायर–२ प्लेअफमा ३ पटक खेलेको छ । २ पटक जितेको छ भने एक खेल हारेको छ ।
राजस्थान तेस्रो पटक क्वालिफायर–२ खेल्दै
आईपीएलको पहिलो सिजनको उपाधि राजस्थानले जितेको थियो । आरआर २०२२ मा पनि उपविजेता बनेको थियो । टोली छैटौं पटक प्लेअफ चरणमा पुगेको छ । रोयल्सले तेस्रो पटक क्वालिफायर–२ खेल खेल्नेछ। यसअघि उसले एक जित र एक हार बेहोरेको थियो । २०२२ मा क्वालिफायर–२ मा आरसीबीलाई हराएर टोलीले फाइनल खेलेको थियो ।
हेड टु हेडमा दुवै टोलीको कीर्तिमान मिश्रित छ, त्यहाँ एक खेलको मात्र अन्तर छ । हालसम्म दुई टोलीबीच जम्मा १९ खेल भएका छन् जसमध्ये ९ खेलमा आरआर र १० खेल एसआरएचले जितेका छन् ।
यो सिजन दुई टोलीबीच एक खेल भएको थियो । घरेलु मैदानमा भएको यो खेल हैदरावादले १ रनले जितेको थियो । यस मैदानमा दुवै टोली पहिलो पटक आमनेसामने हुँदैछन् ।
राजस्थानका रियान पराग टोलीका सर्वाधिक स्कोरर हुन् । उनले १५ खेलमा ५६७ रन बनाएका छन् । जसमा ४ अर्धशतक समावेश छ । टिमका लागि स्पिनर युजभेन्द्र चहलले सर्वाधिक १८ विकेट लिएका छन् ।
अर्कोतर्फ ट्राभिस हेड, अभिषेक शर्मा र हेनरिक क्लासेनले ४०० भन्दा बढी रन बनाएका छन् । जबकि हेड र अभिषेकको ओपनिङ जोडीले २०० भन्दा बढीको स्ट्राइक रेटमा रन बनाएका छन् । दुवैले आक्रामक पारी खेलेका छन् । हेड टोलीका सर्वाधिक स्कोरर (५३३ रन) हुन् ।
बलिङमा टी नटराजनले १२ खेलमा १८ विकेट लिएर उत्कृष्ट प्रदर्शन गरेका छन् । यस्तै, कप्तान प्याट कमिन्सले १६ विकेट र भुवनेश्वर कुमारले ११ विकेट लिएका छन् ।
एमए चिदम्बरम रंगशालाको पिच स्पिनरका लागि सहयोगी सावित भएको छ । अहिलेसम्म यहाँ ८८ आईपीएल खेल खेलिएका छन् । ४८ खेल पहिले ब्याटिङ गर्ने टोलीले जितेका छन् भने ३५ खेल पछ्याउने टोलीले जितेका छन् । यहाँ उच्चतम टोली स्कोर २४६/५ हो, जुन घरेलु टोली चेन्नई सुपर किंग्सले २०१० मा राजस्थान रोयल्स विरुद्ध बनाएको थियो ।
आज चेन्नईको मौसम ठीक हुनेछ । आजको दिन बादल र घामसँगै हल्का चिसो रहनेछ । वर्षाको सम्भावना ५ प्रतिशत मात्रै छ । तापक्रम २९ डिग्रीदेखि ३६ डिग्री सेल्सियससम्म रहने अनुमान गरिएको छ ।
दुबै टोलीका सम्भावित प्लेइङ ११
राजस्थान रोयल्सः सञ्जु सामसन (कप्तान र विकेटकीपर), यशस्वी जैसवाल, टम कोहलर क्याडमोर, रियान पराग, ध्रुव जुरेल, रोभमान पावेल, रविचन्द्रन अश्विन, आवेश खान, ट्रेन्ट बोल्ट, युजवेन्द्र चहल र सन्दीप शर्मा ।
सनराइजर्स हैदरावादः प्याट कमिन्स (कप्तान), ट्राभिस हेड, अभिषेक शर्मा, राहुल त्रिपाठी, नितिश कुमार रेड्डी, हेनरिक क्लासेन (विकेटकिपर), अब्दुल समद, शाहबाज अहमद, विजयकान्त विश्वकान्त, भुवनेश्वर कुमार र टी नटराजन ।
