काठमाडौँ । इंग्लिस प्रिमियर लिग फुटबलमा आज महत्वपूर्ण खेल हुँदैछ । उपाधि होडमा रहेको म्यान्चेस्टर सिटीले टोटेनहम हस्टपरको सामना गर्दैछ । खेल टोटेनहमको घरेलु मैदानमा राति १२ः४५ बजे सुरु हुनेछ ।
सिटीका लागि यो खेल निकै महत्वपूर्ण रहेको छ । आजको खेल जित्दै सिटी शीर्षस्थानमा रहेको आर्सनलसँग अंक दुरी घटाउन चाहन्छ ।
सिटीले आज समेत गरी दुई खेल खेल्न बाँकी रहँदा आर्सनलले एक खेलमात्रै खेल्न बाँकी छ । सिटीको ३६ खेलबाट ८५ अंक छ भने आर्सनलको ३७ खेलबाट ८६ अंक छ । सिटीले आजको खेलपछि अन्तिममा घरेलु मैदानमा वेस्ट हाम युनाइटेडको सामना गर्दा आर्सनल एभर्टनसँग घरेलु मैदानमै भिड्नेछ ।
टोटेनहम भने ३६ खेलबाट ६३ अंकका साथ तालिकाको पाँचौं स्थानमा छ ।
