पुणे, महाराष्ट्रः नेपाल समेत भारत र अन्य मुलुकमा कोभिड–१९ विरुद्धको खोप वितरण गरिरहेको सेरम इन्स्टिच्यूट अफ इन्डियाको पुणेस्थित कारखानामा भिषण आगलागी भएको छ ।
भारतीय संचार संस्था एनडिटिभीका अनुसार सेरमको निर्माणाधीन कारखानामा आगलागी भएको हो । तर आगलागीबाट कोभिसिल्ड खोप उत्पादन गर्ने प्लान्टमा कुनै क्षति नपुगेको अधिकारीहरुले बताएका छन् ।
भारत सरकारले नेपाललाई उपहार स्वरुप प्रदान गरेको १० लाख डोज कोभिसिल्ड खोप पनि सेरमले नै उत्पादन गरेको हो ।
सेरमले अक्सफोर्ड विश्वविद्यालय र अस्ट्राजेनिकाले विकास गरेको भ्याक्सिनलाई भारतमा उत्पादन गरिरहेको छ ।
आगलागी निकै डरलाग्दो भएको भन्दै १० वटा अग्निनियन्त्रक घटनास्थलमा पुगेका छन् । आगो नियन्त्रणमा ल्याउन निकै ठूलो प्रयास भइरहेको छ ।
सेरमले आफूलाई विश्वमै सबैभन्दा ठूलो खोप उत्पादक कम्पनीका रुपमा दाबी गर्दै आएको छ । पुणेमा यसको प्लान्ट १०० एकडभन्दा बढी क्षेत्रमा फैलिएको छ ।
खोप उत्पादनका लागि भन्दै सेरमले हाल कम्तीमा १० वटा भवन निर्माण गरिरहेको जनाएको छ ।
