काठमाडौं । निर्वाचन आयोगले हालै संसद विघटनपछि नेकपाका दुई पक्ष (प्रचण्ड नेपाल र ओली) का क्रियाकलापलाई मान्यता दिन मानेन । सत्तारुढ नेपाल कम्युनिष्ट पार्टीको दुबै समूहले पछिल्ला केही दिनयता गरेक छुट्टाछुट्टै निर्णयलाई मान्यता नदिने निर्णय गरेको छ ।
नेकपा दुवै पक्षले आ आफूले नेकपाको मान्यता पाउनुपर्छ भनी दाबी गर्दै आएका थिए । तर आइतबार बसेको आयोगको बैठकले दुबैको दाबी नपुगेको निष्कर्ष निकालेको हो । दुबै समूहले आफ्नो पक्षलाई मान्यता दिनुपर्ने दाबी सहित विवरण संशोधन गर्न दाबी गरेका थिए । तर ती दुवै कार्य विधानसम्मत नदेखिएको आयोगले जनाएको छ ।
यसअघि दाहाल र नेपाल समूहले अर्का अध्यक्ष केपी शर्मा ओलीलाई पार्टी अध्यक्षबाट हटाएका थिए । त्यसपछि एक अध्यक्षमा माधवकुमार नेपाललाई नियुक्त गरिएको थियो । उता ओली समूहले केन्द्रीय सदस्य थप गरेको जनाएको थियो । त्यस्तै ओली समूहले पनि दाहाललाई पार्टी अध्यक्षबाट हटाएको निर्णय गरेको थियो । तर यी दुवै कार्यलाई वैधानिक मान्यता दिन नसकिने आयोगको आइतबार बसेको बैठकको निर्णयमा छ ।
नेकपाका दुबै समूहलाई आफ्नो दाबी सच्याएर प्रस्तुत गर्न निर्वाचन आयोगले यसअघि नै सात दिने म्याद दिएको थियो । तर दुवै समूहले त्यो निर्णय सच्याउने भन्दा पनि आफूहरु नै वैधानिक भनी दाबी मात्र गरिरहेका थिए ।
