बैतडीकी किशोरी भागरथी भट्टको हत्यामा संलग्न भएको आशंकामा प्रहरीले एकजना स्थानीय युवालाई पक्राउ गरेको छ । ती व्यक्तिलाई प्रहरीले आज नै सार्वजनिक गर्ने जनाएको छ ।
उनी भागरथीकै छिमेकी बैतडी दोगडाकेदार गाउँपालिका- ७ का एक युवा रहेको प्रहरीले जनाएको छ। सुदूरपश्चिम प्रदेश प्रहरी प्रवक्ता प्रहरी वरिष्ठ उपरीक्षक मुकेशकुमार सिंहले मंगलबार सो कुराको जानकारी दिएका छन् । उनले भने- हत्या आशंकामा हामीले एक युवालाई पक्राउ गरेका छौँ, भोलि पत्रकार सम्मेलन गरी अभियुक्त सार्वजनिक गर्दैछौं।
उनलाई अहिले जिल्ला प्रहरी कार्यालय बैतडीको हिरासतमा राखिएको छ । पक्राउ परेका व्यक्ति भागरथीसँगै सनातन धर्म माध्यमिक विद्यालयमा कक्षा ११ मा पढ्ने विद्यार्थी रहेको बताइएको छ । उनीसँग प्रहरीले प्रारम्भिक एक तहको बयान लिएको छ र उनले भागरथीसँगको रिसिइबी का कारण बलात्कार र हत्या गरेको भनी बयान पनि दिएको प्रहरीले स्रोतले जानकारी दिएको छ ।
भट्टको गत माघ २१ गते बुधबार दिउँसो हत्या भएको थियो। त्यस हत्यापछि प्रहरीले केही व्यक्तिलाई निगरानीमा राखेको जनाएको थियो । मंगलबार पक्राउ परेकामा तीमध्येका एकजना रहेका हुन् ।
प्रहरी स्रोतले भागरथीकै छिमेकी युवाले बलात्कारपछि हत्या गरेको स्वीकार गरेको जनाएको छ । साथै उनको हत्यामा ती व्यक्ति शतप्रतिशत संलग्न भएको प्रमाण भेटेको पनि प्रहरीले जनाएको छ तर यो समाचारको औपचारिक पुष्टि भने भएको छैन ।
हिजो साँझ सुदूरपश्चिम प्रदेशका प्रहरी प्रमुख प्रहरी नायब महानिरीक्षक उत्तम सुवेदीले भागरथी बलात्कार हत्यामा संलग्नको नजिनकै प्रहरी पुगिसकेको बताएका थिए । उनले प्रहरी प्रमाणको निकै नजिक पुगेको र त्यस सम्बन्धी थप जानकारी बुधबार पत्रकार सम्मेलन गरेर सार्वजनिक गर्ने जनाएका थिए ।
