काठमाडौं । मेलम्चीको सुरुङ आजदेखि परीक्षण शुरु गरिने भएको छ । साढे २६ किलोमिटरको सुरुङमा पानी भरेर परीक्षण हुन लागेको हो ।
खानेपानी मन्त्रालय र मेलम्ची खानेपानी विकास समितिले आवश्यक सम्पूर्ण प्राविधिक काम पूरा गरेको जनाएको छ । मेलम्चीमा एक औपचारिक कार्यक्रम मार्फत पानी भर्न शुरु गरिएको हो ।
आज (सोमबार) मेलम्ची हेडबक्स साइटमा आयोजित कार्यक्रममा खानेपानी मन्त्री मणी चन्द्र थापाले कन्ट्रोल कक्षको स्वीच थिचेर सुरुङ परीक्षण कार्यको शुरुवात गरेका हुन् ।
गत असारमै सुरुङमा पानी भरेर परीक्षण गरिएको थियो तर हेलुम्बु गाउँपालिका-१ स्थित अम्बाथानको अडिटको मुख्य गेट ९ नं १७० फुटेर निस्केको पानीले आयोजनाका एक इन्जिनीयर र चालकलाई बगाएको थियो ।
त्यसपछि आयोजनाको मुख्य दातृ निकाय एशियाली विकास बैंक (एडीबी) को अनुदान सहयोगअन्तर्गत ४ जना विशेषज्ञको टोलीले सुरुङ, मुहानस्थल, गेटलगायतका संरचनाको पुनः जाँच गरेको थियो ।
सिन्धुपाल्चोकको मेलम्ची खोलादेखि काठमाडौंको सुन्दरीजलसम्मको साढे २६ किलोमिटर सुरुङ भरिन १६ दिन लाग्नेछ । शुरुआती चरण भएकाले सुरुङको क्षमताभन्दा कम पानी हालिने बताइएको छ ।
