काठमाडौं । कृषि विकास बैंक लिमिटेड र ओम हस्पिटल एन्ड रिसर्च सेन्टरबीच आपसी सेवा व्यवसाय बिस्तारका लागि सम्झौता भएको छ।
कृषि विकास बैंकका प्रमुख कार्यकारी अधिकृत गोबिन्द गुरुङको उपस्थितिमा बैंकका तर्फबाट उपमहाप्रबन्धक यज्ञ प्रकाश न्यौपाने र हस्पिटलका तर्फबाट कार्यकारी प्रमुख यम बहादुर महतले हस्ताक्षर गरेका हुन् ।
सम्झौता अनुसार कृषि विकास बैंकका खातावाला ग्राहकहरूले ओम हस्पिटलको ओपिडी शुल्क बाहेकका अन्य सेवामा १० प्रतिशत छुट प्राप्त गर्न सक्नेछन् ।
छुट सुविधा कृषि विकास बैंकका कर्मचारी तथा कर्मचारी परिवारले पनि प्राप्त गर्न सक्ने बैंकले जनाएको छ ।
२०२४ माघ ७ गते स्थापित बैंकको हाल ७ वटै प्रदेशका ७७ जिल्लामा २८३ वटा शाखा कार्यालय रहेका छन् । बैंकका विभिन्न जिल्लामा १६ वटा एक्सटेन्सन काउन्टरहरू रहेका छन भने १२९ वटा एटिएम मेसिनहरू रहेका छन् ।
