काठमाडौँ । लोक कार्यक्रम इन्द्रेणीका सञ्चालक कृष्ण कँडेलले आफूलाई सिध्याउने खेल सुरु भएको आरोप लगाएका छन् । लोकगायक समेत रहेका कँडेलले राजधानीमा एक कार्यक्रम गर्दै उनले यस्तो बताएका हुन् ।
बिहीबार इन्द्रेणीका पाँच कलाकारले सञ्चालक कृष्ण कँडेलले आफूहरूलाई कुटपिट गर्दै अपमानजनक ढंगले जागिरबाट निकालेको गुनासो गरेका थिए । यसै विषयलाई लिएर कँडेलले आफूले शर्मिला श्रेष्ठ र कविता लामालाई नराम्रो कुनै गतिबिधि र नजरले समेत नहेरेको स्पष्ट पारे ।
‘शर्मिला बहिनीले ममाथि तीनवर्ष अगाडि हेरेष्मेन्ट गरेको आरोप लगाउनु भएको छ । त्यस्तो हो भने यो तीनवर्ष के हेरेर बस्नु भयो ।’ उनले भने ।
विगत १५ वर्ष अगाडि ७ जनाबाट सुरु गरेको इन्द्रेणी कार्यक्रममा अहिले ३७ जनाभन्दा बढी रहेको बताएका कँडेलले पछिल्लो समय केहीसमय तलब दिन ढिलो हुँदा आफूमाथि विभिन्न आरोप लागेको स्वीकार गर्दै कँडेलले आफूमाथि लागेको विभिन्न आरोप बनावटी र झुटो रहेको भन्दै खण्डन समेत गरे ।
‘इन्द्रेणी सबैको रुने ठाउँ हो । मैले कसैलाई अन्याय गरेको छैन । कसैलाई नचाहिँदो तवरबाट निकालेको छैन । मेरो बारेमा नेगेटिभ कुरागर्ने, गुटबन्दी गर्ने, काट्छु र मार्छु भनेपछि के गर्ने ?’ उनले प्रश्न गरे । यस्तै, कँडेलले आफूले अहिलेसम्म कसैको पैसा नखाएको भन्दै आम मानिसलाई बाहिर आएका विभिन्न कुराबाट भ्रममा नपर्न समेत अनुरोध गरे ।
