उदयपुर । राष्ट्रिय प्रजातन्त्र पार्टीका अध्यक्ष राजेन्द्र लिङदेनले दरबार हत्या काण्डमा राजा ज्ञानेन्द्रको संलग्नता भएको प्रमाण पुऱ्याएर उनि माथी कारबाही गर्न दलहरु लाई चुनौती दिएका छन् ।
उदयपुरको बेलका नगरपालिकाको रामपुरमा शुक्रबार आयोजित राप्रपा बेलका नगर समितिले आयोजना गरेको सभामा बोल्दै उनले बिना प्रमाण र आधारमा राजालाई उक्त हत्या काण्डमा बदनाम गराउने उदेश्यले दलहरुले मुछ्ने प्रयास गरेको बताए ।
दरबार हत्या काण्ड भएको बेलाका प्रत्यक्षदर्शीहरु अहिले पनि जीवितै छन् उनीहरुसङ बयान लिएर, प्रमाण जुटाएर कारबाही गरे भै गयो नि ” उनले भने बिना प्रमाण कसैलाई बदनाम गराउने उदेश्यले जथाभावी बोल्न नहुने उनले बताए ।
उनले दरबार हत्या काण्डपछि काङ्ग्रेस, एमालेले उनै ज्ञानेन्द्रलाई श्रीपेच लगाएर खुट्टामा दाम चढाएर राजा बनाएको स्मरण गर्न आग्रह समेत गरेका छन् । आफै राजा बनाउने अनि आफै राजालाई हत्यारा भनेर आरोपित गर्ने ? उनले भने ।
उनले २०४६ सालको परिवर्तनपछि एउटै पात्र र एउटै प्रवृत्तिबाट देश संचालन हुँदा देशमा बिकास हुन नसकेको बताए । ”प्रजातन्त्र, लोकतन्त्र, गणतन्त्र जे भने पनि असफल तिनै पार्टी र त्यहि नेताबाट शासनको निरन्तरताले मुलुकले प्रगति गर्न नसकेको उनले आरोप लगाए ।
उनले नेतृत्व इमानदार र देशभक्त हुन नसक्दा तिन दशकमा मुलुक बन्न नसकेको, भ्रष्टाचार र लूटत्रन्त्र हाबी भएको बताए । पहिले कहॅा भ्रष्टाचार हुन्छ भनेर खोज्नु पर्थ्यो तर अहिले भ्रष्टाचार कहॅा छैन भन्नुपर्ने अवस्था रहेको उनले बताए ।
बिगतको चुनावमा गरेको गल्तीको कारण अहिले जनताले दुख पाएको उनले बताए । जहिले पनि काग्रेस, एमाले र माओबादीलाई सत्तामा पुऱ्याएको कारण मुलुकको अबस्था दिनप्रतिदिन नाजुक बन्दै गएको उनले बताए ।
अब बिगतको गल्तीलाइ सच्याउदै सहि पार्टी र नेतालाई नेतृत्वमा ल्याएर मुलुकलाई समृद्धि तर्फ अघि बढाउनुपर्छ, अहिलेको अवस्था आउनुमा राजनीतिक दलको मात्रै दोषी होइनन् तिनलाई मत दिने मतदाता पनि दोषी रहेको उनले गुनासो गरेका छन् । हामी राजनीतिमा विकल्प सहित आएका छौं, अब राप्रपा बाहेक अरुलाइ नेतृत्व दिन नहुने उनले बताए । आमसभालाई राप्रपा अध्यक्ष राजेन्द्र लिङ्देन, प्रवक्ताद्वय भक्ति सिटौला, ज्ञानेन्द्र शाही, खुस्बु ओली लगायतले सम्बोधन गर्नुभएको छ।
