सेन्ट जोन्सः वेस्ट इन्डिजका कप्तान काइरोन पोलार्डले बुधबार एकै ओभरमा छ छक्का हानेर आफ्नो टिमलाई विजयी बनाएका छन् ।
वेस्ट इन्डिजका कप्तान समेत रहेका पोलार्डको एकै ओभरमा छ छक्का हानेको यो पहिलो रेकर्ड हो । उनी एकै ओभरमा छ छक्का हिर्काउने विश्वमै तेस्रो खेलाडी बनेका छन् ।
यसअघि दक्षिण अफ्रिकाका हर्सल गिब्सले सन् २००७ को टी२० विश्वकपमा नेदरल्यान्ड्स विरुद्ध र भारतका युबराज सिंहले इङल्यान्ड विरुद्ध सन् २००७ को टी२० विश्वकपमा एकै ओभरमा छ छक्का बनाएको रेकर्ड छ ।
पोलार्डको धुँवाधार ब्याटिङ मद्दतले श्रीलंका विरुद्धको पहिलो टी–२० खेलमा वेस्ट इन्डिज चार विकेटले विजयी भएको छ ।
यस खेलमा श्रीलंकाका अफ स्पिनर अकिला धनन्जयले एकै ओभरमा तीन विकेट लिएर ह्याट्रिक पूरा गरेका थिए ।
पोलार्डले ११ बलमा ३८ रन बनाएका थिए । श्रीलंकाले जितका लागि दिएको १३२ रनको चुनौती वेस्ट इन्डिजले १४औं ओभरमा पूरा गरेको थियो ।
जितपछि ३३ वर्षीय पोलार्डले आफूले तेस्रो छक्का हानेपछि अरु तीनवटा छक्का पनि हान्न सक्छु भन्ने अनुभूति भएको सुनाए ।
श्रीलंकाली कप्तान एन्जेलो म्याथ्युजले वेस्ट इन्डिजका खेलाडीको प्रशंसा गरेका थिए ।
वेस्ट इन्डिजका प्रारम्भिक जोडी इभिन लेविस र लेन्डल सिमोन्सले २० बलमै ५२ रन बनाएपछि वेस्ट इन्डिजले खेल सहजै जित्ने अनुमान गरिएको थियो ।
वेस्ट इन्डिजको टी२० मा २ वर्षपछि खेल्दै गरेका ४१ वर्षीय क्रिस गेलले खाता समेत खोल्न नपाई धनन्जयको बलमा एलबिडब्लु आउट भएका थिए । धनन्जयले एकै ओभरमा गेल र निकोलास पुरनलाई आउट गरेका थिए ।
टस हारेर ब्याटिङको निम्तो पाएको श्रीलंकाले १३१ रन मात्र बनाएको थियो ।
दोस्रो र तेस्रो टी२० खेल मार्च ५ र ७ मा हुनेछ । यी दुईबीच तीनवटा एक दिवसीय तथा दुई वटा टेस्ट खेल हुनेछन् ।