काठमाडौं। सर्बोच्च अदालतको आदेश पछि आईतबार अपराह्न ४ बजे प्रतिनिधिसभाको बैठक बस्दै छ। औपचारिक रुपमा बिभाजन भै नसकेको नेकपाको सडकमा सर्घष अब संसदमा प्रबेश गरको छ । जसक कारण यस पटकको प्रतिनिधिशभाको बैठकलाई सबैतीर चासो पूर्बक हेरिएको छ ।
सत्तापक्षकै बेन्चमा बस्ने नेकपाका दुबै खेमाका सांसदहरु बैठकमा कसरी प्रस्तुत हुन्छन् भन्ने चासो सबै तीर छ । संसद सचिवालयले आईतबार को बैठकको लागि कार्यसूचि सार्वजनिक गरिसकेको छ । कार्यसूची अनुसार सभामुख अग्नी सापकोटाले राष्ट्रपतिबाट प्राप्त संसदको अधिवेशन आह्वानसम्बन्धी पत्रको व्यहोरा पढेर सुनाउने, त्यस्तै राष्ट्रपतिको कार्यालयबाट प्राप्त मन्त्रिपरिषद् गठन र जिम्मेबार हेरफेर सम्बन्धी पत्रहरूको व्यहोरा पढेर सुनाउने कार्यतालिका तय भएको छ । यसै गरी सभामुख सापकोटाले प्रतिनिधिसभा नियमावली, २०७५ को नियम १० को उपनियम (१) बमोजिम अध्यक्षता गर्ने सदस्यहरूको मनोनयन गर्नुहुने छ ।
बैठकमा प्रधानमन्त्री केपी शर्मा ओलीले संवैधानिक परिषद् (काम, कर्तव्य र अधिकार कार्यविधि) सम्बन्धी (पहिलो संशोधन) अध्यादेश, २०७७” पेश गर्नुहुने छ । बैठकमा गृहमन्त्री रामबहादुर थापाले नेपाल प्रहरी र प्रदेश प्रहरी (कार्य सञ्चालन, सुपरीवेक्षण र समन्वय) (पहिलो संशोधन) अध्यादेश, २०७७, सामाजिक सुरक्षा (पहिलो संशोधन) अध्यादेश, २०७७, तेजाब तथा अन्य घातक रासायनिक पदार्थ (नियमन) अध्यादेश, २०७७ र स्वास्थ्य तथा जनसंख्या मन्त्री हृदयेश त्रिपाठीले औषधी (तेस्रो संशोधन) अध्यादेश, २०७७ पेश गर्ने कार्यसूची रहेको छ।
त्यस्तै, कानून, न्याय तथा संसदीय मामिला मन्त्री लीलानाथ श्रेष्ठले फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेश, २०७७, यौनहिंसाविरुद्धका केही ऐनलाई संशोधन गर्ने अध्यादेश, २०७७, बेपत्ता पारिएका व्यक्तिको छानविन, सत्य निरुपण तथा मेलमिलाप आयोग (तेस्रो संशोधन) अध्यादेश, २०७७ उनले पेश गर्नुहुने छ । बैठकमा निधन भएका सांसद तथा पूूर्वसांसदको सम्मानमा शोक प्रस्ताव पनि पेश हुने छ ।
