नेकपाको सडकको झगडा संसद छिरेको छ । भोलि बस्ने संसद अधिवेशनका लागि कार्यसूची सार्वजनिक भइसकेको छ । यो अधिवेशन आह्वानसँगै यतिखेर सडकमा छताछुल्ला परेको देखिएको नेकपाको झगडाले अब वैधानिक रुपमा नै संसदमा प्रवेश पाएको छ ।
तर यो झगडाको निरुपण संसदमा पनि जसरी सडकमा भनिएको छ त्यतिचाँडै समाधान होला जस्तो भने देखिँदैन । प्रधानमन्त्री केपी ओलीले विघटन गरिसकेको संसद सर्वाेच्च अदालतले पुनस्र्थापना गरेर राजनीतिक विवाद संसदले नै मिलाउनु भन्ने सन्देश दिए पनि संसदलाई पनि त्यति सजिलो भने देखिएको छैन ।
भोलि संसदको बैठक बस्दैछ, कार्यसूची पनि जारी भएको छ । तर विघटन पछि पुनः ब्युँतिएर शुरु हुन लागेको संसद बैठकका केही घन्टाअघि सम्म पनि अब कसरी अघि बढ्ने र कसरी नयाँ सरकार बनाउने भन्ने स्पष्ट खाका पनि तयार छैन ।
यो संसद पुनस्र्थापना भएकै दिनमा प्रधानमन्त्री केपीले भन्नुभएको थियो– अब के हुन्छ, संसदमै देखिन्छ तमासा । आखिर अब संसदमा तमासा नै हुने स्थिति देखिएको छ ।
संसद पुनस्र्थापना भएपछि प्रधानमन्त्रीको राजीनामा आउने धेरैको अपेक्षा थियो, तर त्यसो भएन । बरु अब नेकपाभित्रै कसले आफ्नो पक्षमा बहुमत पुर्याउने भन्ने संसदीय खेल भित्रभित्रै शुरु भएको छ ।
ओली पक्ष या दाहाल नेपाल पक्षमध्ये कसले आफ्नो पक्षमा बहुमत पुर्याउने भन्ने खेल अहिले पनि भित्रभित्रै जारी छ । तर यो समाचार तयार पार्दासम्म पनि संसदीय दलमा कसको पक्षमा बहुमत छ भन्ने आधिकारिकता प्राप्त भएको छैन । यद्यपि, दुवै पक्षले आफ्नो पक्षमा बहुमत रहेको बताइरहेका छन् ।
न प्रधानमन्त्रीले राजीनामा दिने वाला छन् र नत्र प्रचण्ड प्रधानमन्त्री बन्ने नै सुविधा यो संसदबाट उनलाई उपलब्ध छ । अनि नत ओलीलाई प्रधानमन्त्री पदबाट बर्खास्त गर्ने सुविधाजनक बहुमत नै ओली इतरका पार्टीका शक्तिसँग छ । यो कुनै अवस्था पनि देखिँदैन ।
अबको निर्णायक शक्ति भनेको नेपाली काँग्रेस हो । तर उ पनि खुलेको छैन । काँग्रेसको मौनताले के बोलिरहेको छ भन्ने यथार्थ अझै बाहिर आउन सकेको छैन । जो निर्णायक हो, उसैले नबोलेपछि यसको परिणाम कस्तो निस्किन्छ भन्ने प्रश्नको जवाफ काँग्रेस नै दिन सकेको छैन ।
बाहिरबाट हेर्दा ओलीलाई सरकारबाट हटाउने विषयमा सबै सहमत छन् । तर कसरी हटाउने भन्ने खाका बन्न सकेको छैन । यो खाका कुनै एक दलबाट बन्दैन, तर सामुहिक प्रयास भएको छैन ।
काँग्रेसले यसअघि स्थानीय निर्वाचनमा प्रचण्डबाट धोका खाएको भन्दै प्रचण्डको प्रस्तावमा नजिकिन सकेको छैन । नत प्रधानमन्त्री ओलीको पक्षमा नै काँग्रेस खुल्न सकेको छ । बरु यसपालि काँग्रेसले नेकपा औपचारिक विभाजन नै नभएकोले त्यस अघि केही निर्णय नगर्ने भनेर मौन बसेको छ ।
तर हिजोमात्र देउवा निवासमा बसेको काँग्रेसका पदाधिकारीको बैठकमा अब काँग्रेस नखुल्ने हो भने सरकारबाट ओली नहट्ने र पछि हटाउन पनि नसकिने अवस्था आउने भन्ने सदस्यहरुको संख्या बढी देखियो ।
जसका कारण संसदमा अविश्वासको प्रस्ताव नआउँदासम्म नबोले पनि अब काँग्रेसले निर्णायक बोली बोल्ने अवस्था देखिएको छ । सत्तारुढ नेकपाको विवाद गएराति झनै बढेको छ । जस्तो कि ओली इतरको दाहाल नेपाल समूहले सो दलका नेता पुष्पकमल दाहाल प्रचण्डलाई लगातार दुई पटकसम्म संसदीय दलको नेतामा चयन गरेको छ ।
यता सो निर्णयको संसदभित्रै प्रतिवाद गर्ने तयारीमा ओली समूहका सांसदहरु छन् । सत्तारुढ नेकपा एक हुन नसकेको र औपचारिक रुपमा भए पनि कानुनी रुपमा दुई हुन नसकेको यो अवस्थामा शुरु भएको संसदको हिउँदे अधिवेशन कसरी अघि बढ्छ भन्ने विषयले संसदभित्रै थप विवाद ल्याउने स्पष्टै छ ।
आजको संसदमा यस्तो अवस्था छ कि प्राविधिक कारणले दाहाल नेपाल समूहमा रहेका सत्तारुढ दलका सांसदले सरकारको प्रतिपक्षमा हुने भएका छन् । सायद यस्तो अवस्था नेपालको संसदीय इतिहासमा पहिले थिएन होला । यस्तै जटिलताले नै संसदमा छिरेको नेकपाको सडकको झगडाले यहाँ पनि पार पाउन केही समय लाग्ने देखिन्छ ।
