वेलिङ्टनः अस्ट्रेलिया विरुद्धको टी२० क्रिकेट शृंखला न्यूजील्यान्डले जितेको छ । वेलिङ्टनमा आइतबार खेलिएको पाँच खेलको शृंखलाको अन्तिम खेलमा न्यूजील्यान्ड सहजै सात विकेटले विजयी भयो । जितका नायक न्यूजील्यान्डका मार्टिन गप्टिल र डेभोन कन्वे रहेका थिए ।
टस जितेर पहिले ब्याटिङ रोजेको अस्ट्रेलियाले जितका लागि न्यूजील्यान्डसामु १४३ रनको चुनौती प्रस्तुत गरेको थियो । तर उक्त लक्ष्य न्यूजील्यान्डले २७ बल बाँकी छँदै तीन विकेट गुमाएर पूरा गरेको थियो । यो जितसँगै शृंखला न्यूजील्यान्डले ३–२ ले जितेको छ ।
न्यूजीन्यान्डले अन्तिम खेलमा तीन जना स्पिनरलाई खेलाएर जोखिम लिएको थियो । तर तीनै जना स्पिनरले अविश्वसनीय बलिङ प्रदर्शन गरेका थिए । स्पिनर इस सोढीले ३ (२४ रन) र मार्क च्यापम्यानले १ (९ रन) विकेट लिएका थिए भने मिचेल सान्टनरले चार ओभरमा २१ रन मात्र दिएका थिए ।
मध्यम लक्ष्य पछ्याउने क्रममा मैदानमा उत्रेका मार्टिन गप्टिलले ७१ रन बनाएका थिए जसमा उनले चार चौका र चार छक्का हिर्काएका थिए । कन्वेले पनि ३६ रन बनाएका थिए । यो प्रारम्भिक जोडीले पहिलो विकेटका लागि १०६ रनको साझेदारी गरेका थिए ।
न्यूजील्यान्डका कप्तान केन विलियम्सन पहिलो बलमै आउट भएर न्यूजीन्यान्ड केही दबाबमा देखिए पनि ग्लेन फिलिप्सले पाँच चौका र दुई छक्का प्रहार गरेर सहज विजयतर्फ डोर्याएका थिए ।
अस्ट्रेलियाका लागि म्याथ्यु वेडले ४४ तथा आरोन फिन्चले ३६ र मार्कस स्टोइनिसले २४ रनको योगदान दिएका थिए । AFP
