काठमाडौँ । दक्षिण अफ्रिकामा जारी आइसिसी यू–१९ विश्वकप क्रिकेट प्रतियोगिताको सुपर सिक्स अन्तर्गत भारतले नेपाललाई २९८ रनको लक्ष्य दिएको छ ।
दक्षिण अफ्रिकाको माङ्गाउग ओभल क्रिकेट मैदानमा टस जितेर ब्याटिङ थालेको भारतले निर्धारित ५० ओभरमा ५ विकेटको क्षतिमा २९७ रन जोड्यो ।
भारतका लागि कप्तान उदय शरन र सचिन धासले शतकीय इनिङ्स खेले । शरनले १०७ बलमा १०० रन बनाउँदा धासले १०१ बलमा ११६ रनको योगदान दिए । यस्तै, आदर्श सिंहले २१, प्रियान्सु मोलियाले १९ र अर्शिन कुलकर्णीले १८ रन जोडे ।
बलिङतर्फ नेपालका गुलशन झाले तीन तथा आकाश चन्दले एक विकेट लिए ।
नेपाल सुपर सिक्स खेल खेल्नुअघि नै सेमिफाइनल दौडबाट बाहिरिएको छ । नेपाल सुपर सिक्सको पहिलो खेलमा बङ्गलादेशसँग ५ विकेटले पराजित भएको थियो ।
आजको खेलमा भारतले जित हासिल गरे सेमिफाइनलमा पुग्नेछ । यता नेपाल भने आफ्नो अन्तिम खेलमा भारतलाई पराजित गर्दै प्रतियोगितामा सुखद अन्त्य गर्न चाहन्छ ।
