• ११ फाल्गुन २०८०, शुक्रबार
  •      Fri Feb 23 2024
  •   Unicode
Logo

दोस्रो टेस्टअघि भारतलाई दुई ठूला झट्काः जडेजा र राहुल चोटका कारण बाहिर



एजेन्सी । इङ्ल्यान्डविरुद्ध फेब्रुअरी २ बाट सुरु हुने दोस्रो टेष्ट खेलअघि भारतीय टोलीलाई दुई ठूलो झट्का लागेको छ । बायाँ हाते स्पिन अलराउन्डर रविन्द्र जडेजा र ब्याट्सम्यान केएल राहुल चोटका कारण बाहिर भएका छन् ।

चयनकर्ताहरूले सौरभ कुमार, सरफराज खान र वाशिंगटन सुन्दरलाई टोलीमा समावेश गर्ने निर्णय गरेका छन् । पाँच खेलको सिरिजको पहिलो खेलमा भारत २८ रनले पराजित भएको थियो । यो खेलमा जडेजा र राहुल घाइते भएका थिए ।

हैदरावादमा भएको पहिलो टेस्टको चौथो दिन जडेजाको ह्यामस्ट्रिङमा चोट लागेको थियो । उनको खुट्टा स्क्यान गरी रिपोर्ट आउन बाँकी छ । यसै क्रममा केएल राहुलले तिघ्रामा दुखेको गुनासो गरिरहेका छन् । जसका कारण उनलाई पनि दोस्रो टेस्टमा आराम दिइएको छ ।

हैदरावाद टेस्टको चौथो दिन इंग्ल्यान्डका कप्तान बेन स्टोक्सको सिधा प्रहारबाट रविन्द्र जडेजा रनआउट भएका थिए। प्याभिलियन फर्कने क्रममा उनलाई हिँड्न कठिनाइ भएको थियो । खेल सकिएपछि जडेजाले हैदराबादमै आफ्नो खुट्टा स्क्यान गराए ।

जडेजाको स्क्यान रिपोर्ट मुम्बई इन्स्टिच्युटमा पठाइएको छ, जहाँ सबै खेलाडीको स्क्यान रिपोर्ट पठाइन्छ । रिपोर्ट आएपछि मात्र जडेजा एक टेस्टबाट बाहिरिने कि पूरै शृङ्खलाबाट बाहिरिने निश्चित हुनेछ ।