काठमाडौँ । अन्तर्राष्ट्रिय क्रिकेट काउन्सिल (आईसीसी)ले सन् २०२३ को अवार्ड घोषणा गरेको छ । विराट कोहली चौथो पटक आईसीसी एकदिवसीय क्रिकेटर अफ द इयर चुनिएका छन् भने सूर्यकुमार यादव टी–२० क्रिकेटर अफ द इयर बने । यस्तै, अष्ट्रेलियाका ओपनर उस्मान ख्वाजा टेस्टमा उत्कृष्ट भए ।
अस्ट्रेलियाका कप्तान प्याट कमिन्स गत वर्षको आईसीसी क्रिकेटर अफ दि इयर बने भने महिला विधामा नताली सिभर ब्रन्टले यो अवार्ड प्राप्त गरिन् ।
कमिन्सले गत वर्ष आफ्नो टोलीलाई २ आईसीसी प्रतियोगिता जिताएका थिए । यसमा विश्व टेस्ट च्याम्पियनसिप र विश्वकप समावेश छ । दुवै फाइनलमा अष्ट्रेलियाले भारतलाई हराएको थियो ।
आईसीसीले बिहीबार १३ विधामा अवार्ड वितरण गरेको हो । जसमा टेस्ट, ओडीआई र टी–२० टिम अफ द इयरसहित तीनवटै फर्म्याटका पुरुष र महिला क्रिकेटर अफ द इयरको नाम सार्वजनिक गरिएको छ ।
विराट कोहली चौथो पटक आईसीसी ओडीआई प्लेयर अफ द इयर बने । यसअघि उनले सन् २०१२, २०१७ र २०१८ मा पनि यो अवार्ड जितेका थिए । सन् २०२० मा आईसीसीले उनलाई दशकको उत्कृष्ट ओडीआई प्लेयरको अवार्ड पनि दिएको थियो ।
