एजेन्सी । बिग ब्यास लिग (बीबीएल १३)को १३ औं सिजनको उपाधि ब्रिसबेन हिटले जितेको छ । ब्रिसबेनले दोस्रो पटक यो उपाधि जितेको हो ।
आज भएको फाइनल खेलमा ब्रिसबेनले सिड्नी सिक्सर्सलाई ५४ रनले पराजित गर्यो । ब्रिस्बेन हीटले २०१२-१३ को बीबीएल सिजनमा उपाधि जितेको थियो । यसपछि, २०२४ मा, ब्रिसबेन हिटले ११ वर्षको खडेरी समाप्त गर्यो ।
फाइनल खेलमा पहिले ब्याटिङ गरेको ब्रिस्बेन हीटले निर्धारित २० ओभरमा ८ विकेट गुमाएर १६६ रन बनायो । जोस ब्राउनले ३८ बल सामना गर्दै ५३ रन बनाए । यस इनिङ्समा उनले ५ चौका र ३ छक्का प्रहार गरेका थिए । नाथन म्याकस्विनीले ३२ बलको सामना गर्दै ३३ रन बनाए । म्याट रेन्साको ब्याटबाट ४० रन आयो ।
जवाफमा १६७ रनको लक्ष्य पछ्याएको सिड्नी सिक्सर्सको टोलीले १७ दशमलव ३ ओभरमा ११२ रन मात्रै बनायो ।
तीन पटकको च्याम्पियन सिड्नी सिक्सर्सको चौथो पटक च्याम्पियन बन्ने सपना अधुरो रह्यो । सिड्नी सिक्सर्स टोलीले सन् २०११, २०१९ र २०२० मा बिग ब्यास लिगको उपाधि जितेको थियो । ब्रिसबेनका स्पेन्सर जोनसनले फाइनल खेलमा ४ ओभरमा २६ रन मात्र खर्चेर ४ महत्वपूर्ण विकेट लिएका थिए । उनी प्लेयर अफ द म्याच घोषित भए ।
