कोलम्बो । भारतले बुधबार नगद सङ्कटमा परेको श्रीलङ्कालाई तत्काल तेल खरिद गर्नका लागि ५० करोड डलर ऋण दिने घोषणा गरेको छ ।
श्रीलङ्का आर्थिक समस्याले थर्मल पावर जेनरेटरहरु चलाउन असमर्थ भएको छ । व्यापारीहरुसँग तेल खरिदका लागि विदेशी मुद्रा अत्यन्त कम हुँदा यातायात सञ्जालसमेत प्रभावित भएको छ ।
ठूलो कोइला पावर प्लान्टमा बारम्बार ब्रेकडाउनले अघोषित बिजुली कटौती बढेको छ भने खाना पकाउने ग्यास र मट्टितेलको अभाव चर्किएको छ ।
दुइ देशका अधिकारीहरूले दुई हप्ताको वार्तापछि बुधबार औपचारिक सम्झौतामा हस्ताक्षर गरेका छन् ।
एक भारतीय कूटनीतिज्ञ भारतबाट तत्काल आवश्यक खाद्यान्न र औषधि आयातका लागि थप १ अर्ब डलरको क्रेडिट लाइनमा वार्ता भइरहेको बताएका छन्।
“५० करोड डलर श्रीलङ्काले भारतीय आपूर्तिकर्ताहरूबाट पेट्रोलियम उत्पादनहरू खरिद गर्नका लागि हो”, ती अधिकारीले भने ।
श्रीलङ्काको चामल, अटोमोटिभ पार्टपुर्जा र सिमेन्टको अभाव पनि भोगिरहेको छ । सुपरमार्केटहरूलाई केही मुख्य खाद्य पदार्थहरू राशन दिन बाध्य पारिएको छ। अभावले गत महिना खाद्य मुद्रास्फीतिलाई २५ प्रतिशतको रेकर्ड स्तरमा पुर्याएको थियो।
पर्यटन श्रीलङ्काका लागि विदेशी मुद्रा आर्जन गर्ने प्रमुख क्षेत्र हो तर कोभिड-१९ को महामारीका कारण यो क्षेत्र ध्वस्त भएको छ।
सरकारले पैसा बचत गर्न विदेशी कूटनीतिक नियोगहरू बन्द गरेको छ र विदेशी मुद्रा जोगाउन करिब दुई वर्षदेखि आयातमा व्यापक प्रतिबन्ध लगाएको छ।
तीन अन्तर्राष्ट्रिय मूल्याङ्कन एजेन्सीहरूले गत वर्षको अन्त्यदेखि श्रीलङ्कालाई यसको ३५ अर्ब डलरको सार्वभौम ऋण सेवा गर्न सक्षम नहुने डरमा डाउनग्रेड गरेका छन्।
श्रीलङ्काले चिनियाँ ऋण तिर्न पनि बेइजिङसँग थप ऋण मागेको छ, जुन देशको बाह्य ऋणको करिब १० प्रतिशत छ।
अधिकारीहरूले विगतमा पूर्वाधार परियोजनाहरूका लागि चीनबाट धेरै ऋण लिएका छन् । तर चिनियाँ ऋण निकै महँगो रहेको र त्यसले श्रीलंकामाथि दबाब परेकाे छ । एएफपी
