काठमाडौं । बाँके जिल्लाको डुडुवा गाउँपालिका–६ जयेन्दु बाल सुधार गृहमा हिजोदेखि सुरु भएको तनाव रोकिएको छैन ।
प्रहरीले स्थिति तनावपूर्ण भएपछि नियन्त्रणमा लिने प्रयास जारी राखेको जनाएको छ । सो बालगृहमा हिजो दिउँसोदेखि नै तोडफोड र आपसमा झडपहरु भएका थिए । बालसुधार गृहमा राखिएका युवाहरु आफू–आफूमै लड्ने र सुधारगृह तोडफोड गर्ने गर्न थालेपछि प्रहरी खटाइएको छ । उनीहरुलाई नियन्त्रणमा लिने प्रयास जारी रहेको तर तोडफोड र तनाव जारी नै रहेको प्रहरीले जनाएको छ ।
सो घटनामा परेर केही व्यक्ति घाइते पनि भएका छन् । उनीहरुले कसैलाई पनि सुधारगृह भित्र प्रवेश गर्न नदिएकाले भित्रको अवस्था विस्तृतमा थाहा हुन सकेको छैन । सिभिलमा खटिएका प्रहरी बाल सुधार गृहको भित्र पसेर स्थिति नियन्त्रणमा लिन खोजेका तर पनि नसकेपछि आज बिहान नेपालगञ्जबाट थप प्रहरी टोली गएको छ ।
प्रहरीलाई सुधार गृहमा बल प्रयोग गर्ने अधिकार नभएकाले स्थिति नियन्त्रणमा आउन नसकेको एक अधिकारीले जनाएका छन् ।
