काठमाडौं: कर्मचारी संचय कोषले सुधिर बस्नेतले अलपत्र छाडेको ललितपुरको इमाडोलस्थित कोहिनुरको घरजग्गा लिलामी गर्ने भएको छ ।
कोषले आज एक सूचना प्रकाशन गरी कोहिनुर हिल हाउजिङका नाममा रहेको ललितपुर साविकको इमाडोल गाविस वडा नं ४ रहेको १०–९–२–० जग्गा तथा त्यहाँ निर्माणाधीन आवासीय भवन खरिदका लागि सिलबन्दी आह्वान गरेको छ। कोहिनुर हिल हाउजिङ सञ्चय कोषका नाममा दृष्टिबन्धक छ।
कोषका अनुसार हाउजिङका लागि इन्भेष्टमेन्ट मेगा बैंकको पुल्चोकमा रहेको खातामा रू एक हजार जम्मा गरी सूचना जारी भएको १५ दिनभित्र बोलपत्र फाराम बुझाउन सकिनेछ।
लिलाम सकार्न इच्छुक व्यक्ति वा फर्मले २१ दिनभित्र कोषको कर्जा, लगानी तथा ट्रेजरी व्यवस्थापन विभाग, पुल्चोकमा आवेदन दिन सकिने कोषको सूचनामा जनाइएको छ ।
तर कोषले सूचनामा ऋणीले कोषलाई बुझाउनु पर्ने रकम लिलाम बिक्रीको सूचनामा उल्लेखित म्यादभित्र बुझाएमा लिलाम बिक्रीको प्रक्रिया अन्त्य गर्न सकिने र बोलपत्र बुझाउनेहरुको धरौटी फिर्ता गरिने पनि बताएको छ ।
हाउजिङ कम्पनी लिलाम बिक्रीका लागि कोषले यसअघि सूचना जारी गरे पनि बिक्री भने हुन सकेको थिएन।
