काठमाडौं । नेकपा एमालेका नेता महेश बस्नेतले प्रधानमन्त्री नसच्चिए एमालेले सिंहदबारको कुर्सीबाट सडकमा पछार्ने चेतावनी दिएका छन् । बिहिबार तीनकुनेमा सरकारविरुद्ध आयोजित विरोध सभालाई सम्बोधन गर्दै बस्नेतले यस्तो बताएका हुन् ।
उनले आफूहरुलाई निहु खोजेर आउने कसैलाई नछाड्ने चेतावनी दिँदै भने, ‘हामीले कानून मान्यौं निषेधित क्षेत्र तोडेनौं प्रचण्डजीलाई पनि चेतावनी दिन चाहन्छु तपाईं सच्चिनुभएन भने तपाईंको ३२ सिटे पार्टी र तपाईं जोगिन नेपाली जनताको भविष्य अन्धकारमय बनाउनुभयो भने सिंहदबारको कुर्सीबाट ल्याएर माइतीघरमा होकि तीनकुनेको सडकमा पर्छार्ने हो त्यो तागत एमालेसँग छ ।’
उनले फागुनमा काठमाडौंमा मानवसागर उतार्ने बताउदै अराजकतावादी, अपराधि र तस्करहरुलाई सदाको लागि सफा गर्ने बताए ।
उनले भने, ‘एमालेले समाज रुपान्तरणको अभियान चलाउने हो । हामी कसैलाई हस्तक्षेप गर्दैनौं । कसैको विरुद्ध कार्यक्रम गर्दैनौं । तर, हाम्रो कार्यक्रमविरुद्ध निहु खोजेर आउँछ भने हामी छाड्दैनौं । दुर्गा प्रसाईंको आजबाट हावा खुस्किएको छ । म चेतावनी दिन चाहन्छु भोलिदेखि ठीक ठाउँमा बस, अब हामी यो कार्यक्रम सात प्रदेशमा विस्तार गर्दैछौं ।’
