काठमाडौं । नेकपा एमालेका अध्यक्ष केपी शर्मा ओलीले मंसिर ७ गते दुर्गा प्रसाईंको अभियानको लागि आएका महिलाहरूमाथि दुर्व्यवहार गर्ने युवा संघ नभएको दाबि गरेका छन् ।
बुधबार पार्टीको केन्द्रीय कमिटीको बैठकलाई सम्बोधन गर्दै ओलीले महिलाहरूमाथि दुर्व्यवहार भएको घटनामा युवा संघको संलग्नता नरहेको बताएका हुन् ।
अनेक प्रकारको षड्यन्त्रले एमालेलाई बदनाम गर्ने र चरित्र हत्या गर्ने कोसिस भइरहेको बताउदै उनले भने, ‘आज बिहान एउटा भिडिओ आएपछि मैले युवा संघलाई सोधेको थिएँ । युवा संघले पनि भिडिओ हेरेर थाहा पायौं भन्छ । हाम्रो कुनै संलग्नता छैन भन्छ । युवा संघको यस्तो खालको क्रियाकलाप होइन हुन सक्दैन भनेर मलाई बताएको थियो । हामी यस सम्बन्धमा स्पष्ट पर्छौं, हाम्रो संलग्नता छैन अध्ययन गर्दैछौं भनिसक्या छ । हाम्रो संलग्नता नभएको युवा संघले मलाई बताएको छ ।’
एमालेभित्र रहेर कसैलाई गल्ती गर्ने छुट नभएको बताउँदै ओलीले बदनाम गर्न खोजे स्वीकार्य नहुने बताए ।
