एजेन्सी । पाकिस्तान क्रिकेट टीमको कप्तान बाबर आजमले कप्तानी छोड्ने घोषणा गरेका छन् । बुधबार एक विज्ञप्ति जारी गर्दै उनले सबै फर्म्याटको क्रिकेटबाट कप्तान पद छोड्ने निर्णय लिएका हुन् ।
सन् २०१९ देखि कप्तानी गरेका बाबरले पाकिस्तानी टोलीलाई क्रिकेटको विश्व वरीयताको शीर्षस्थानमा समेत पुर्याएका थिए । तर जारी विश्वकपको सेमिफाइनलमा पुग्न असफल भएपछि चर्को अलोचना खेपेका बाबरले कप्तान पद छोड्ने निर्णय लिएका हुन् । उनले व्यक्तिगत रुपमा ३० को औसतमा ९ खेलमा ३ सय २० रन जोडेका थिए ।
बाबरले आफ्नो यात्रामा पाकिस्तानका क्रिकेट समर्थकलाई धन्यवाद दिँदै भनेका छन्, ‘मलाई सन् २०१९ मा पाकिस्तान क्रिकेट बोर्डले कप्तानको जिम्मेवारी सुम्पिएको याद छ । पछिल्लो ४ वर्षमा मैले मैदान भित्र र बाहिर धेरै उतारचढावको सामना गरेको छु । म हरेक पल पाकिस्तानको गौरव बढाउन तत्पर रहें । पाकिस्तानलाई विश्वको नम्बर १ टोली बनाउन खेलाडी, प्रशिक्षक र व्यवस्थापक सबैको संयुक्त भूमिकाले सम्भव भएको थियो । म यो यात्रामा पाकिस्तानका क्रिकेट समर्थकलाई धन्यवाद दिन चाहन्छु ।’
आगामि कप्तानलाई आफ्नो अनुभव र लगावले साथ दिने बताउदै उनले थपे ,‘म आज पाकिस्तानको सबै फर्म्याटबाट कप्तान पद छोडेको घोषणा गर्न चाहन्छु । यो कठिन निर्णय थियो तर यो समय सही भन्ने मेरो बुझाइ छ । म खेलाडीको भूमिकामा पाकिस्तानबाट सबै फर्म्याटमा खेल्नेछु । म अब आउने कप्तानलाई आफ्नो अनुभव र लगावले साथ दिनेछु । म पाकिस्तान क्रिकेट बोर्डलाई म प्रति देखाएको विश्वासको लागि धन्यवाद दिन चाहन्छु ।’
