काठमाडौँ । नेपालगञ्जमा हत्या गरिएका चेतन मानन्धरकी पत्नी भारती शेर्पा मानन्धर नेकपा एमालेका अध्यक्ष केपी शर्मा ओलीलाई भेट्न बालकोट पुग्नु भएको छ ।
आफ्नो न्यायको लडाइँमा साथ दिएको भन्दै आज शुक्रबार बिहान शेर्पा ओलीलाई धन्यवाद दिन बालकोट पुग्नुभएको हो । भारतीले न्यायको पक्षमा उभिएर आफूलाई सहयोग गरेको भन्दै अध्यक्ष ओलीलाई धन्यवाद दिनुभएको थियो ।
सर्वोच्च अदालतले चेतन मानन्धरको हत्यामा संलग्न प्रमाणित भएपछि जन्मकैदको सजाय पाएका गुन्डा नाइके योगराज ढकाल रिगललाई सरकारको सिफारिसमा राष्ट्रपति रामचन्द्र पौडेलले आममाफी दिने गरी गरेको निर्णय बिहीबार बदर गरेको थियो । निर्णय बदर गर्ने बित्तिकै प्रहरीले रिगललाई नेपालगञ्जबाट पक्राउ गरिसकेको छ ।
अध्यक्ष ओलीसँगको भेटका क्रममा भारतीले न्यायको लडाइँमा साथ दिएकोमा धन्यवाद दिनुभएको थियो । अध्यक्ष ओलीले पनि सत्यको जीत भएको बताउनुभएको थियो ।
अध्यक्ष ओलीले भारतीलाई स्वास्थ्यको ख्याल राख्न सुझाव दिनुभएको थियो । उहाँले भारतीलाई राम्रो उपचार गराउन पनि आग्रह गर्नुभयो ।
