काठमाण्डौ । वडादशैंको आठौं दिन असोज शुक्ल अष्टमीमा आइतबार विभिन्न शक्तिपीठमा भगवतीको पुजाआजा र दर्शन गर्न भक्तजनहरुको भीड जारी छ ।
विगतका वर्षहरुमा झैं यसपाली पनि राजधानीको भद्रकालीस्थित भद्रकाली मन्दीरमा पुजाआजा र दर्शन गर्ने भक्तजनहरुको एकाविहानैदेखि भीड थियो ।
हिन्दु धर्ममा आस्था राख्ने भक्तजनहरु मात्रै भद्रकाली मन्दीरमा आएका थिएनन । मागेर आफ्नो जीविका चलाउनेदेखि भीडभाडमा सोझासाझा दर्शनार्थीहरुलाई ठग्नको लागि भारतीय साधुहरु पनि त्यतिकै सकृय देखिन्थे ।
मन्दीर हाता बाहिर सडक किनारमा रोकेर राखेका सयौं मोटरसाइकल र त्यतिकै संख्यामा रहेका नीजि कारहरुको पुजा गर्न गएका सवारी साधनका धनीहरु सवारी साधन पुजा गर्न भनेर झुम्मिएका पण्डितहरुबाट पनि ठगिइरहेका देखिन्थे ।
भद्रकाली मन्दीर वरिपरिको बाटोमा सवारी आवागमन व्यवस्थित बनाउन केही ट्राफिक प्रहरी खटिएको देखियता पनि जनपद प्रहरीको उपस्थित नदेखिँदा भक्तजनहरुलाई ठग्ने भारतीय साधु र नेपाली पण्डीतहरुलाई सहज भइरहेको थियो ।
दुई पांग्रे सवारी साधन र नीजि कारहरु पुजा गर्ने पण्डीतहरु ‘पुजाको विधि प्रकृया पुगेन भने दुर्घटनामा पर्नसक्छ’ भन्दै (इमोशनल ब्ल्याकमेल गर्दै) सवारी धनीसंग मनलागी दक्षिणा माग्दै गरेको दृष्य एकातिर देखिन्थ्यो भने अर्काेतिर हेर्दै ठगजस्ता देखिने कालो र रातो वस्त्र धारण गरि कानको लोतीमा ठुला मुन्द्रा झुण्ड्याएका भारतीय साधुबाट ठगिईरहेका देखिन्थे । उनीहरु भक्तजनलाई लठ्ठ बनाएर उनीहरुको ब्याग र पर्समा भएको प्राय: सबै नगद दिउँदिउँ लाग्ने गराउँदै थिए ।
