काठमाडौं । फिफा विश्वकप २०२६ छनोटमा ‘अवे गोल’को काउन्ट नहुने भएको छ । जस अनुसार नेपालले लाओसविरुद्ध विजयी हासिल गर्न स्पष्ट जितको आवश्यक छ ।
सामान्यत दुई लेग ढाँचामा खेलाईने खेलहरुमा ‘अवे गोल’ काउन्ट गरिन्छ । अवे गोलको नियम अनुसार दुई लेगमा बराबरी भएको खण्डमा जुन टोलीले सर्वाधिक गोल गरेको हुन्छ, त्यही टोली विजयी घोषित गरिन्छ । अवे गोल नियम रहेको खण्डमा नेपाल र लाओसबिचको खेल गोलरहित बराबरीमा सकिए लाओस विजेता हुने थियो ।
बिहिबार दशरथ रंगशालामा भएको पहिलो लेगमा नेपाल र लाओसले १–१ को बराबरी खेलेका थिए । जसमा लाओसले एक ‘अवे गोल’ गरेको थियो । खेलको ३३औँ मिनेटमा लाओसका कप्तान बाउलपछान बोयनकोङले गोल गरेका थिए । पछि अन्जन विष्टले दोस्रो हाफको सुरुवाती गोल गर्दै खेललाई बराबरी गरेका थिए ।
फिफाले यस पटकको विश्व कपका लागि छनोटमा ‘अवे गोल’को नियम हटाएको छ । त्यसैले अर्को खेल गोलरहित सकिएपनि नेपाल बाहिरिने छैन । दोस्रो खेल बराबरी भए ३० मिनेटको समय थप गरि खेलाईने छ । थप समयमा पनि बराबरी भएमा खेलको निर्णय पेनाल्टी सुटआउटबाट हुनेछ ।
पहिलो चरणको विश्वकप छनोट दुई लेगको फम्र्याटमा खेलाइएको हो । जसअन्तर्गत नेपाल र लाओसबीचको दोस्रो लेगको खेल यही असोज ३० गते लाओसमा हुनेछ । सो खेलका लागि नेपाली टोली आज त्यसतर्फ प्रस्थान गर्नेछ । यस खेलको विजेता विश्वकप छनोटको दोस्रो चरणमा पुग्नेछ ।
